Atyraý oblysynda mas kúıinde qoǵamdyq orynda júrgen 4433 adam ustalǵan

ATYRAÝ. KAZINFORM — Atyraý oblysynda jyl basynan beri 4433 adamnyń qoǵamdyq orynda mas júrgeni anyqtaldy. Qazir maskúnemdikke salynǵan 1342 adam arnaıy esepke tur.

Atyraý oblystyq polıtsııa departamentiniń baspasóz qyzmetinen málim etkendeı, qoǵamdyq orynda mas júrgender úshin birneshe ákimshilik jaza qaralǵan. Jazanyń biri –aıyppul salý, ekinshisi — ákimshilik qamaýǵa alý.

«Qoǵamdyq oryndarda mas kúıde júrýdiń saldary bar. Birinshiden, ózge adamdarǵa qaýip tóndirýi múmkin. Ekinshiden, bul qoǵamdyq tártiptiń buzylýyna soqtyrady. Atyraý oblysynda jyl basynan beri qoǵamdyq oryndarda mas kúıinde júrý jáne ishimdikterdi tyıym salynǵan jerde ishýge baılanysty 4 433 derek tirkeldi. Al, QR Ákimshilik quqyq buzýshylyq týraly kodeksiniń 200-babynda kózdelgen alkogol ónimin ótkizý jónindegi talaptardy buzýshylarǵa 132 hattama toltyryldy. Bul arnaıy erejelerin buzyp, kámeletke tolmaǵandarǵa alkogol ónimderin satqan. Keıbir saýda núktelerinde alkogol ónimderi lıtsenzııasyz satylǵany anyqtaldy», — dep habarlady departamenttiń baspasóz qyzmeti.

Qazir Atyraýda alkogoldi kóp ishetin 1342 adam profılaktıkalyq esepke alynǵan. Al, 42 adam maskúnemdikten emdelý úshin arnaıy mekemege ornalastyrylǵan.
Eske sala ketelik, buǵan deıin Atyraýda jyl basynan beri kólik róline otyrǵan 732 mas júrgizýshi ustalǵanyn habarlaǵan bolatynbyz.