Atyraý oblysynda mal izdeýge shyqqan 3 adam joǵalyp ketken

Atyraý oblysynda 3 adam mal izdeýge shyǵyp, habar-osharsyz ketken. Olar búgin tańda aman-esen tabyldy, dep habarlaıdy Kazinform.

Bul derekti oblystyq tótenshe jaǵdaılar departamentiniń qoǵammen baılanys toby rastady.

Keshe, 9 qańtarda Inder aýdanynyń ortalyǵy — Inderbor kentinen úsh adam mal izdeýge shyqqan. Alaıda, olar keri oralmaǵan. 

«Mal izdeýge shyqqan úsh adamnyń habar-osharsyz ketkeni týraly 9 qańtarda saǵat 23:05-te habar kelip tústi. Osyǵan baılanysty Inder aýdandyq tótenshe jaǵdaılar bóliminiń qyzmetkerkerleri jedel izdestirý-qutqarý jumystaryna tartyldy. Joǵalǵan 1977, 1984 jáne 1990 jylǵy sol kúni saǵat 08:00-de «Toyota Land Cruiser-100» markaly avtokólikpen Batys Qazaqstan oblysynyń Aqjaıyq aýdany, Janama aýylyna qaraı mal izdeýge shyqqan. Alaıda, olar keri oralmaǵan, baılanysqa shyqpaǵan», - dep habarlady departamenttiń qoǵammen baılanys toby.

Búgin, 10 qańtarda izdestirý-qutqarý jumystary sátti aıaqtaldy. Tańǵy saǵat 05:20 shamasynda joǵalǵan adamdar «Aıý» qystaǵynyń mańynan tabylyp, qaýipsiz jerge jetkizildi. Olar medıtsınalyq kómekti qajet etpedi. Aıý qystaǵy Inderbor kentinen 35 shaqyrym qashyqtyqta ornalasqan.

«Biz mal izdeýge shyqqan edik. Jol qurǵaq emes. Keı tusynda balshyq bar. Avtokóligimiz batpaqty jerge batyp, isten shyqty. Mobıldi baılanys telefonynyń qýaty taýsylyp, habarlasý múmkin bolmady. Bizdi tez arada izdep taýyp, aman-esen eldi mekenge jetkizgen qutqarýshylarǵa alǵys bildiremiz», - deıdi tabylǵan adamnyń biri. 

Іzdestirý-qutqarý jumystaryna Inder aýdandyq tótenshe jaǵdaılar bóliminen 5 qyzmetker men 1 tehnıka, aýdandyq polıtsııa bóliminen 2 qyzmetker men 1 tehnıka tartyldy. 

Eske sala ketelik, buǵan deıin Atyraý oblysynda qutqarýshylar byltyr 172 adamdy qutqarǵanyn jazǵan edik.