Atyraý oblysynda mal urlyǵyna qarsy blokbeketter qoıyldy

ASTANA. KAZINFORM — Blokbeketterde krımınaldyq jáne patrýldik polıtsııa qyzmetkerleri, sondaı-aq ýchaskelik ınspektorlar kezekshilik etedi, dep habarlaıdy Polisia.kz.

22-31 qańtar aralyǵynda Atyraý oblysy aýmaǵynda mal urlyǵynyń aldyn alý, atalǵan qylmysqa qatysy bar kúdiktilerdi anyqtaý, ustaý jáne olardy zańda belgilengen jaýapkershilikke tartý maqsatynda «Mal urysy» jedel-profılaktıkalyq is-sharasy ótkizilip jatyr. Osyǵan baılanysty óńirdegi avtojoldarda mal urlyǵyna qarsy is-qımyldy kúsheıtý maqsatynda 5 blokbeket qoıyldy.

— Blokbeketter quramynda krımınaldyq jáne patrýldik polıtsııa qyzmetkerleri, sondaı-aq ýchaskelik ınspektorlar bar. Tártip saqshylary aýyl sharýashylyǵy janýarlary men et ónimderin tasymaldaıtyn kólik quraldaryn tekserip, veterınarııalyq jáne ilespe qujattarynyń bolýyn, sondaı-aq júktiń zańdy shyǵý tegin anyqtap jatyr, — delingen habarlamada.

Jyl basynan beri Atyraý oblysy aýmaǵynda mal urlyǵy boıynsha 4 qylmystyq is tirkeldi. Onyń 3-eýi ashylyp, bir derek boıynsha jedel-izdestirý is-sharalary jalǵasyp jatyr. Taldaý nátıjesi mal urlyǵynyń jasalýyna negizgi sebepterdiń biri — mal ıeleriniń janýarlardy uzaq ýaqyt qaraýsyz qaldyrýy jáne jaıylymdarda maldy baqylaýsyz jaıý ekenin kórsetti. Tirkelgen 4 derektiń 1-eýi qoradan, al 3-eýi qaraýsyz qalǵan jaıylymdardan jasalǵan.

— Sonymen qatar, jyl basynan beri aýyl sharýashylyǵy janýarlarynyń joǵalýyna qatysty 19 derek tirkelip, onyń 13-i tabylyp, ıelerine qaıtaryldy. Osyǵan baılanysty polıtsııa oblys turǵyndary men aýyl sharýashylyǵy janýarlarynyń ıelerin zań talaptaryn qatań saqtaýǵa shaqyrady. Aýyl sharýashylyǵy janýarlaryn tasymaldaý kezinde olardyń tıesiligin rastaıtyn ilespe qujattardyń bolýy mindetti. Qujattar bolmaǵan jaǵdaıda, quqyq buzýshylar QR ÁQBtK-niń 406-babyna sáıkes ákimshilik jaýapkershilikke tartylady, — dep eskertti tártip saqshylary.

Sondaı-aq maldy ıeleriniń nemese ýákilettik bergen adamdardyń (baqtashylardyń) qadaǵalaýynsyz jaıýǵa tyıym salynady. Polıtsııa azamattardy óz múlkiniń saqtalýyna jaýapkershilikpen qarap, aýyl sharýashylyǵy janýarlaryn baqylaýsyz jaıýǵa jol bermeýge úndeıdi.

Osydan buryn Túrkistan oblysynda mal urlyǵymen aınalysqan 19 qylmystyq top ustalǵanyn jazǵanbyz.