Atyraý oblysynda qus fabrıkasy eki jyldan beri jumys istemeı tur

ATYRAÝ. KAZINFORM – Atyraý oblysynda qus fabrıkasy eki jyldan beri jumys istemeı tur. Osyǵan baılanysty fabrıkanyń quryltaıshysy oblys ákiminen kómek surady.

Qus fabrıkasyn Qurmanǵazy aýdanyndaǵy «Buıyrǵyn» aýyl sharýashylyǵy kooperatıvi iske qosqan. Onda jylyna 800 tonna qus etin óndirý kózdelgen. Alaıda, qus fabrıkasynyń quryltaıshysy Janar Amanǵalıevanyń aıtýynsha, eki jyldan beri jumys toqtap tur.

«Bul fabrıka qospasyz ári hımıkatsyz qus ónimderin shyǵardy. Tek aýdandy emes, oblys turǵyndaryn taza qus etimen qamtamasyz etken edik. Bızneske alynǵan sýbsıdııany keri qaıtaramyz dep, shyǵynǵa ushyradyq. Biraq, eshbir tehnıka buzylǵan joq. Al, 50-ge jýyq qyzmetkerim jumyssyz otyr. Endi osy kásibimdi jandardyrý úshin 4-5 paıyzben qaıtarymdy qarjy suraımyn. Jumys bastaǵan soń alty aıdan keıin qaryzymdy qaıtara bastaımyn», - deıdi Janar Amanǵalıeva.

Atyraý oblysynyń ákimi Serik Shápkenov jaýapty basshylarǵa jergilikti qus fabrıkasynyń jumysyn jandandyrýdy qarastyrý týraly tapsyrma berdi. Qus fabrıkasynyń quryltaıshysyna shildege deıin bıznes-jospar daıyndap, keıin birlese talqylaýdy usyndy.

Eske sala ketelik, buǵan deıin Atyraý mańynda 37 sharýa qojalyǵynyń 3120 gektar jerin tasqyn sý basqanyn jazǵan edik.