Atyraý oblysynda Qulsarydan 120 shaqyrym qashyqtyqta jer silkindi

ATYRAÝ. KAZINFORM – Atyraý oblysynda jer silkindi. Jerasty dúmpýi Jylyoı aýdanynyń ortalyǵy – Qulsary qalasynan 120 shaqyrym qashyqtyqta tirkelgen.

Qazaq ulttyq derekter ortalyǵynyń jedel málimetine qaraǵanda, jer silkinisi 10 sáýirge qaraǵan túnde bolǵan.

– Astana ýaqytymen túngi 01 saǵat 40 mınýtta (Grınvıch boıynsha 09 sáýir 20 saǵat 40 mın) Qulsary qalasynan ońtústik-shyǵysqa qaraı 120 shaqyrym jerde silkinisi boldy. Epıtsentrdiń koordınattary: 45.95 gradýs soltústik endik, 54.28 gradýs shyǵys boılyq. Magnıtýdasy mb=4.3. Energetıkalyq klass K=9.1., - dep habarlady atalǵan ortalyqtan.

Osyǵan oraı Atyraý oblystyq Tótenshe jaǵdaılar departamentinen Seısmologııa ınstıtýtynda jer silkinisi boıynsha derek tirkelmegenin málim etti.

Eske sala ketelik, budan buryn Almatydaǵy daýyl saldarynan úıdiń shatyrlary ushyp, aǵashtar qulaǵanyn habarlaǵan bolatynbyz.