Atyraý oblysynda quqyǵy buzylǵan tutynýshylarǵa 14 mln teńge qaıtarylǵan

ATYRAÝ. KAZINFORM – Atyraý oblysynda jyl basynan beri tutynýshylardan 541 shaǵym túsken. Quqyǵy buzylǵan tutynýshylarǵa 14 mln teńge qaıtarylǵan. 

Atyraý oblysy boıynsha saýda jáne tutynýshylardyń quqyqtaryn qorǵaý departamenti basshysynyń orynbasary Erkebulan Taǵashovtyń aıtýynsha, byltyr tutynýshylardyń 320 shaǵymy qaralǵan. Al, bıyl shaǵym aıtýshylardyń sany 41 paıyzǵa ósken.

«Al bıyl qaralǵan shaǵymnyń sany 541-ge jetti. Onyń ishinde 423 shaǵymda (78%) bólshek saýdadaǵy túıtkil kóterildi. Shaǵymnyń negizgi sebebi – sapasyz taýardy aıyrbastaýdan nemese aqshasyn qaıtarýdan bas tartý. Departamentke túsken ótinishterdiń 372-si nemese 64 paıyzy qanaǵattandyryldy. Soǵan sáıkes tutynýshylarǵa 14 mıllıon teńgesi keri qaıtaryldy», - dep habarlady Erkebulan Taǵashov.

Onyń deregine súıensek, 163 adam ózderin qyzyqtyrǵan másele boıynsha aqparat alǵan. Al, 39 ótinish qozǵalǵan máselege baılanysty basqa memlekettik organdarǵa jiberilgen. Qazir 4 ótinish qaralyp jatyr.

«Bıyl departament mamandary júrgizgen tekserýdiń nátıjesinde 33 kásipker ákimshilik jaýapkershilikke tartyldy. Olarǵa jalpy somasy 4 mln 671 myń teńge kóleminde aıyppul salyndy», - dep málim etti Erkebulan Taǵashov.

Eske sala ketelik, budan buryn Atyraýda jer telimin zańsyz ıelengenderge 4,2 mln teńge aıyppul salynǵanyn habarlaǵan edik.