Atyraý oblysynda kóshi-qon zańyn eki márte buzǵan sheteldik elden shyǵaryldy

Atyraý oblysynda kóshi-qon zańdylyǵyn eki márte buzǵan sheteldiktiń isi sotta qaraldy. Sot qaýlysymen sheteldik elden shyǵaryldy, dep habarlaıdy Kazinform.

Atyraý oblysynyń Mahambet aýdandyq sotynda Ózbekstan Respýblıkasynyń azamatyna qatysty ákimshilik quqyq buzýshylyq týraly is qaraldy. Kórshi eldiń azamaty kóshi-qon salasyndaǵy zańdylyqty eki márte buzǵan.

– Ózbekstan Respýblıkasynyń azamaty ıÝ. buryn elimizdiń kóshi-qon salasyndaǵy zańnamasyn buzǵany úshin QR Ákimshilik quqyq buzýshylyq týraly kodeksiniń 517-babynyń 5-bóligimen ákimshilik jaýapqa tartylǵan. Alaıda, ıÝ. 2023 jyldyń 17 naýryzynda Qazaqstan Respýblıkasynyń aýmaǵyna jeke maqsatpen kelip, jergilikti atqarýshy organnyń ruqsatynsyz JShS-ǵa jumysqa ornalasqan. Sóıtip, zańsyz eńbek qyzmetin júzege asyrǵan, - dep habarlady sottyń baspasóz qyzmeti.

Sot ákimshilik isti qaraý kezinde sheteldiktiń jasy 63-te ekenin eskerdi. Sheteldikke ákimshilik qamaýǵa alý jazasy qoldanylǵan joq. Sot qaýlysymen Ózbekstan Respýblıkasynyń azamaty ıÝ. kináli dep tanylyp, Qazaqstan Respýblıkasynyń sheginen ákimshilik jolmen shyǵaryp jiberý túrindegi jaza taǵaıyndaldy.

Sot qaýlysy zańdy kúshine endi.

Eske sala ketelik, budan buryn Óz elinde alıment tóleýden qashyp júrgen sheteldik Atyraýda ustalǵanyn jazǵan bolatynbyz.

Atyraý oblysynda kóshi-qon zańnamasyn buzǵan 200-ge jýyq shetel azamaty anyqtaldy.

Sheteldiktiń biri – 1984 jylǵy azamattyń túngi mezgilde qoǵamdyq orynda mas kúıinde júrgeni úshin ustaldy. Tekserý kezinde oǵan Ózbekstan Respýblıkasynda alıment tóleýden jaltarǵany úshin halyqaralyq izdeý jarııalanǵany anyqtaldy.