Atyraý oblysynda kólikke quıatyn gaz tapshylyǵy bar ma
ATYRAÝ. KAZINFORM – Atyraý oblysyndaǵy gaz quıý beketterine 7 myń 20 tonna suıytylǵan munaı gazy bólingen. Onyń keıbir bóligi Aqtóbe jáne Batys Qazaqstan oblysynan jetkizildi.
Jergilikti kólik júrgizýshileri gaz quıý beketterinde gaz tapshylyǵy týyndaǵanyn aıta bastady. Keıbir BAQ beketterde kezekte turǵan kóliktiń kóbeıgenin jazyp jatyr.
Al, Atyraý oblystyq energetıka jáne turǵyn úı-kommýnaldyq sharýashylyq basqarmasy basshysynyń orynbasary Jantas Ospannyń deregine súıensek, munaıly óńir úshin 7 myń 20 tonna suıytylǵan munaı gazy bólingen.
«Atyraý munaı óńdeý zaýytynyń resmı málimetine sáıkes, josparlanǵan jóndeý jumystaryna baılanysty óndiris ýaqytsha toqtady. Osyǵan oraı suıyltylǵan gaz kórshi oblystardan tasymaldanady. Qazan aıynda ishki naryqty suıyltylǵan gazben tolyq qamtamasyz etý úshin Energetıka mınıstrliginen qosymsha 880 tonna avtogaz suratyldy», - deıdi Jantas Ospan.
Onyń málimetinshe, óńirdegi gaz quıý beketterinde 7 myń 20 tonna suıytylǵan gaz qory bar. Onyń ishinde Atyraý munaı óńdeý zaýytynan 408 tonna gaz alynǵan. Batys Qazaqstan oblysyndaǵy «Jaıyqmunaı» JShS-dan 2 myń 490 tonna, Aqtóbe oblysyndaǵy «SNPS-Aqtóbemunaıgaz» AQ-dan 4 myń 122 tonna gaz jetkizilgen.
Eske sala ketelik, buǵan deıin Atyraý munaı óńdeý zaýytynda josparlanǵan aldyn alý jumystary bastalǵanyn habarlaǵan edik.
Sondaı-aq, «Qashaǵan» ken ornyndaǵy jóndeý jumysy 7 qazanda bastalatynyn jazǵan bolatynbyz.
