Atyraý oblysynda kóktemgi sý tasqynyna daıyndyq qalaı júrip jatyr
ATYRAÝ. KAZINFORM — Atyraý oblysynda kóktemgi sý tasqynynyń aldyn alý úshin daıyndyq bastaldy. Qazir ınjenerlik jumys jospary bekitildi.
Atyraý oblystyq jumyldyrý daıarlyǵy jáne azamattyq qorǵaý basqarmasynyń bólim basshysy Bekturǵan Masatovtyń málimetine súıensek, bolýy yqtımal tabıǵı apattyń aldyn alý jumystaryna 244 tehnıka men 3 tikushaq jumyldyrylady.
«Bıyl tabıǵı sıpattaǵy tótenshe jaǵdaı kezinde 10 kólik-ınfraqurylym nysany buzyldy. Qazir kezde sol nysandardy qalpyna keltirý júrip jatyr. Kóktemde oblys aýmaǵynda 590,6 shaqyrym bóget turǵyzyldy. Endi bul bógetti oblystyń teńgerimine alynady», — dep habarlady Bekturǵan Masatov.
Onyń aıtýynsha, aldaǵy kóktemde bolýy yqtımal sý tasqynyna daıyndyq bastalǵan. Osy kezge deıin 48,5 tonna janar-jaǵar maı, 235 tonna ınertti materıal ázirlengen. Sondaı-aq, 161 myńnan astam qapshyq, 69 dana shatyr men 5 myńnan astam tósek-oryn jabdyǵy daıyn tur.
«Kóktemge deıin bógettiń sapasy tekseriledi. Bógettiń osal tustary anyqtalsa, nyǵaıtý josparlanyp otyr. Munyń bári sý tasqynyna daıyndyq boıynsha bekitilgen ınjenerlik jumys josparyna sáıkes júrgiziledi. Josparǵa sáıkes Jem ózeniniń aǵynyn retteý, tabıǵı sıpattaǵy tótenshe jaǵdaıdy joıý jáne avarııalyq qalpyna keltirý jumystaryn júrgizý maqsatynda jumys jobasy jasaldy. Onda Jylyoı aýdanyndaǵy Jem ózeni men Qursaı kanalynyń arnasyn, Qamyskól kólin tazartý qarastyryldy. Jem ózeniniń jáne Qulsary qalasynyń aýmaǵymen ótetin Qursaı kanalynyń jaǵalaýynda qorǵanys bógeti ornatý jumystary atqarylady», — dep málim etti Bekturǵan Masatov.
Osy kezge Qursaı kanalynyń 32, al, Jem ózeniniń 2 shaqyrymyn tereńdetý jumysy júrgizilgen.
Eske sala ketelik, buǵan deıin Atyraýda kóktemde salynǵan 590 shaqyrym bóget oblystyń teńgerimine alynatynyn jazǵan bolatynbyz.
