Atyraý oblysynda qoqys polıgonyn joımaǵan 30 ákimge aıyppul salynǵan

ATYRAÝ. KAZINFORM – Atyraý oblysynda qoqys polıgonyn joımaǵan 30 ákimge aıyppul salynǵan.

Ekologııa jáne tabıǵı resýrstar mınıstriniń orynbasary Mansur Oshýrbaevtyń aıtýyna qaraǵanda, Atyraý qalasyndaǵy kúkirtti sýtektiń negizgi kózi kárizdik tazartý qondyrǵylary, «Týhlaıa balka» men «Kvadrat» býlaný alańy bolyp otyr.

«Atyraý oblysyndaǵy atmosferalyq aýanyń jaı-kúıin jaqsartý maqsatynda Jol kartasy bekitilip, oǵan 45 is-shara engizildi. Bul – óńirdegi ekologııa problemalaryn keshendi sheshýge baǵyttalǵan is-shara. Atalǵan jol kartasy aıasynda «Týhlaıa balka» men «Kvadrat» býlaný alańdaryn qalpyna keltirý júrgizilip jatyr. Atyraý qalasynyń sol jaǵalaýynda kárizdik tazartý qondyrǵysynyń qurylysy aıaqtaldy. Qala aýmaǵynda atmosferalyq aýaǵa taraıtyn shyǵaryndylardyń barlyq kózine túgendeý jumysy júrgizildi», -dedi Mansur Oshýrbaev.

Onyń aıtýyna qaraǵanda, aımaqtaǵy taǵy bir eleýli máselelerdiń biri – ruqsat etilmegen qoqys oryndary.

«Byltyr ruqsatsyz qoqys tógilgen 100 oryn anyqtaldy. Sondaı oryndardyń 95 paıyzy joıyldy. Polıgondardy joıýdy nashar júrgizgen ár deńgeıdegi 30 ákim ákimshilik jaýapqa tartylyp, jalpy somasy 882,4 myń teńge aıyppul salyndy», -dedi Mansur Oshýrbaev.

Eske sala ketelik, budan buryn Atyraýda aýany lastaıtyn qaldyqtardyń basym bóligi 4 kompanııanyń úlesine tıesili ekenin jazǵan edik.