Atyraý oblysynda qazan aıynda tumaý men JRVI juqtyrý deregi kóbeıdi

Atyraý oblysynda 1 qazannan beri 7 754 adam tumaý jáne jedel respıratorlyq-vırýstyq ınfektsııasyn juqtyrǵan. Qazir ınfektsııalyq statsıonarda 63 bala, 17 júkti áıel men 3 eresek adam em qabyldap jatyr, dep habarlaıdy Kazinform agenttigi. 

Oblystyq densaýlyq saqtaý basqarmasynyń basshysy Qaısar Abdalıevtyń aıtýynsha, qazan aıy bastalǵannan beri tumaý jáne jedel respıratorlyq-vırýstyq ınfektsııany juqtyrý deregi kóbeıgen.

«Atyraý oblysynda 7754 adam tumaý jáne jedel respıratorlyq-vırýstyq ınfektsııasyn juqtyrdy. Onyń ishinde JRVI-men 6998, tumaýmen 9, bronhıt dıagnozymen 746 adam tirkeldi. Tumaýǵa qarsy «Grıppol +» vaktsınasynyń 65 myń dozasy satyp alyndy. Qazir jedel-járdem qyzmetiniń 50 brıgadasy, 26 brıgada qala boıynsha, al 24 brıgada aýdan boıynsha qyzmet kórsetedi. Densaýlyq saqtaý mınıstrliginiń usynysyna oraı mobıldi toptar qaıta jandandyrylyp, súzgi kabınetteriniń jumysy kúsheıtildi. Balalarǵa, júkti áıelderge úıden qaraý, mıkroaımaqtar boıynsha úı aralaý, úıdegi statsıonarlardy uıymdastyrý, kómek kórsetýdiń barlyq kezeńinde naýqastardyń jaǵdaıyn baǵalaý kómegi uıymdastyryldy. Balalarǵa sapaly kómek kórsetý maqsatynda pedıatrııalyq mýltıdıstsıplınarly mamandar toby quryldy», - dedi Qaısar Abdalıev.

Onyń málimetinshe, vırýsty juqtyrý balalar arasynda baıqalyp otyr. Máselen, 5135 bala JRVI juqtyrǵan. Osy vırýs 621 júkti áıelden anyqtalǵan. Sondaı-aq 478 bala bronhıt dıagnozymen tirkelgen.

«Qazir ınfektsııalyq statsıonardyń JRVI bólimshesinde 63 bala em qabyldap jatyr. Olardyń arasynda 1 jasqa deıingi 29, sondaı-aq, 1-14 jastaǵy 34 bala bar. Bularǵa qosa 17 júkti áıel men 3 eresek naýqas emdelýge jatqyzyldy», - dep málim etti Qaısar Abdalıev.

Eske sala ketelik, budan buryn Atyraý oblysynda jyl basynan beri 2 300-ge jýyq adamnan júrek aýrýy anyqtalǵanyn jazǵan bolatynbyz.