Atyraý oblysynda qaýipti elektr-turmystyq aspaptardy satý faktisi anyqtaldy
ASTANA. KAZINFORM — Atyraý oblysy boıynsha Tehnıkalyq retteý jáne metrologııa komıteti departamentiniń qyzmetkerleri elektr tehnıkasyn satý kezinde zań buzýdy anyqtady.
Atyraý qalasy turǵynynyń ótinishi sheńberinde qaýipsizdik talaptaryna sáıkes kelmeıtin aıaq pen arqaǵa arnalǵan elektr massajerlerin satyp alý faktisi boıynsha «AMANAT GROUP» jeke kásipkeriniń satýshysyna qatysty jospardan tys tekserý júrgizildi.
— Tekserý is-sharalarynyń nátıjesinde tehnıkalyq reglamentterdiń talaptaryna sáıkes kelmeıtin ónimdi satý faktisi anyqtaldy. Atap aıtqanda, ónimde memlekettik jáne orys tilderindegi tańbalaý jáne paıdalaný qujattary bolmaǵan, sondaı-aq ónimniń TR TS 004/2011 «Tómen voltty jabdyqtyń qaýipsizdigi týraly» jáne TR TS 020/2011 «Tehnıkalyq quraldardyń elektromagnıttik úılesimdiligi» tehnıkalyq reglamentterine sáıkestigin rastaıtyn qujattar bolmaǵan, — delingen Saýda jáne ıntegratsııa mınıstrligi taratqan habarlamada.
Anyqtalǵan buzýshylyqtar boıynsha quqyq buzýshy 843 375 teńge mólsherinde aıyppul túrindegi ákimshilik jaýapkershilikke tartyldy.
Sonymen qatar, quqyq buzýshyǵa talaptarǵa sáıkes kelmeıtin ónimdi satýǵa tyıym salý týraly nusqama berildi.
Esterińizge sala keteıik, Qazaqstan Respýblıkasynyń «Tehnıkalyq retteý týraly» Zańynyń 35-babyna sáıkes, tehnıkalyq reglamentter qoldanysqa engizilgen ónimniń naryqta aınalymda bolýynyń qajetti sharty onyń tehnıkalyq reglamentterde belgilengen talaptarǵa sáıkestigi jáne osy sáıkestiktiń belgilengen tártippen rastalýy bolyp tabylady.
Sáıkestikti baǵalaýdan ótpegen, tehnıkalyq reglamentter qoldanysqa engizilgen ónimdi aınalymǵa shyǵarýǵa, sondaı-aq sáıkestikti baǵalaý týraly qujattarsyz nemese Tehnıkalyq retteý tiziliminde ne Eýrazııalyq ekonomıkalyq odaqtyń berilgen nemese qabyldanǵan sáıkestikti baǵalaý qujattarynyń biryńǵaı tizilimderinde osyndaı qujattardyń bar ekendigi týraly málimetter bolmaǵan jaǵdaıda ónimdi aınalymǵa shyǵarýǵa tyıym salynady.
Aıta ketelik Qazaqstanda jasalǵan taýarlarǵa marketpleısterdegi izdeý nátıjelerinde artyqshylyq beriledi.
