Atyraý oblysynda qatty jel birneshe nysannyń shatyryn ushyrdy
ATYRAÝ. KAZINFORM — Atyraý oblysynda qatty jeldiń saldarynan qonaqúı men jataqhananyń, kópqabatty turǵyn úıdiń shatyry ushyp ketti. «Nıva» kóligi búlindi.
Atyraý oblystyq tótenshe jaǵdaılar departamentiniń qoǵammen baılanys tobynyń málimetinshe, keshegi qatty jelden birneshe nysan búlingen.
«Keshe, 6 aqpanda ekpini sekýndyna 16-20 metrge jetken qatty jel soqty. Sonyń saldarynan Atyraý qalasyndaǵy soltústik óndiristik aımaq aýmaǵynda ornalasqan «Sultan» qonaqúıiniń shatyry ushyp ketti. Búlingen shatyrdyń jalpy aýdany — 912 sharshy metr. Ushqan shatyr «Nıva» markaly avtokóligin basyp qaldy. Oqıǵa ornynda jedel qutqarý jasaǵynyń 6 qutqarýshysy men 1 tehnıka jumyldyryldy», - dep habarlady departamenttiń baspasóz qyzmeti.
Sondaı-aq Jylyoı aýdanyndaǵy «Teńiz» ken ornynda ornalasqan «Vaterans» kemp-jataqhanasynyń shatyry ushqan. Sol kúni Atyraý qalasynda kópqabatty turǵyn úıdiń de shatyry búlingen. Bul úı Balyqshy shaǵyn aýdanyndaǵy A.Qunanbaev kóshesinde ornalasqan.
Eske sala ketelik, budan buryn Atyraýdyń keıbir bóligi men oǵan irgeles eldi mekenderde jaryq óship qalǵanyn jazǵan edik.
Keıin sınoptıkter Atyraý turǵyndaryna aldaǵy úsh kúnde saq bolýdy eskertti.
