Atyraý oblysynda kásipkerlerdiń 153 mln teńgege baǵalanǵan múliktik quqyǵy qorǵaldy
ATYRAÝ. KAZINFORM — Atyraý oblysynda shaǵyn jáne orta bıznes ókilderi sáýlet jáne qala qurylysy, jer qatynastary, salyq, memlekettik satyp alý, agroónerkásip kesheni sekildi salalarda qıyndyqqa tap bolyp otyr. Osyǵan oraı byltyr kásipkerlerden 111 ótinish túsken.
«Atameken» UKP Atyraý óńirlik fılılaly dırektorynyń quqyqtyq máseleler jónindegi orynbasary Sársenbaı Joldybaevtyń málimetinshe, kásipkerler kezdesetin 6 qıyndyq anyqtalǵan.
«Bizdiń basty maqsatymyz — kásipkerlerdiń quqyqtary men zańdy múddelerin qorǵaý. Máselen, bıznes ókilderiniń problemalyq máseleleri sáýlet jáne qala qurylysy, jer qatynastary, salyq, memlekettik satyp alý, agroónerkásip kesheni jáne basqa salalarda jıi týyndaıdy. Kásipkerlerdiń qorǵalǵan múliktik quqyqtarynyń jalpy somasy 153 mln teńgeden asty. Shaǵyn jáne orta bızneste 6 júıeli problema anyqtalyp otyr. Onyń ekeýi respýblıkalyq deńgeıde, tórteýi oblystyq deńgeıde sheshýdi qajet etedi. Osy kezge deıin eki másele oń sheshimin tapty, tórteýi áli qaralyp jatyr», - deıdi Sársenbaı Joldybaev.
Onyń aıtýyna qaraǵanda, problemalyq máseleler óńirlik palata janyndaǵy kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńeste talqylanady.
Byltyr keńestiń 9 otyrysynda 22 másele qaralǵan.
«Byltyr 18 másele bıznes ókilderiniń paıdasyna sheshildi. Isataı, Inder jáne Mahambet aýdandarynda kóshpeli otyrysy ótkizilip, aýyl kásipkerleriniń problemalyq máseleleri qaraldy. Keńes otyrystarynyń qorytyndysymen 1 laýazymdy tulǵa tártiptik, 2 laýazym ıesi ákimshilik jaýapkershilikke tartyldy», - dep málim etti Sársenbaı Joldybaev.
Óńirlik fılıal mamandary bıznes sýbektilerine qatysty sotta qaralǵan isterge qoldaý kórsetip otyr. Byltyr zańgerler talap aryzdar, apellıatsııalyq jáne kassatsııalyq shaǵymdar jobalaryn daıyndap, 10 sot otyrysyna qatysqan. Qaralǵan isterdiń 6-ýy bıznestiń paıdasyna sheshilgen. Al, 3 iske baılanysty bas tartylǵan, 1 is áli qaralyp jatyr. Sotta kásipkerlerdiń qorǵalǵan múliktik quqyqtarynyń somasy 9 mln teńgeden asqan.
Eske salalyq, buǵan deıin Atyraýda bir jylda tutynýshylardyń 36 mln teńgesi keri qaıtarylǵanyn habarlaǵan edik.
