Atyraý oblysynda kásipkerlerden 2,6 mln teńge salyq bereshegi óndirildi
ATYRAÝ. KAZINFORM – Atyraý oblysynyń Isataı aýdanynda prokýratýranyń aralasýynan keıin kásipkerlerdiń bıýdjet aldyndaǵy salyq bereshegi óteldi.
Aýdan prokýratýrasy jergilikti kásipkerlik sýbektileriniń salyq tóleý tártibine taldaý júrgizip, birqatar zań buzýshylyqtardy anyqtaǵan.
Tekserý barysynda keıbir kásipkerlerdiń jyljymaıtyn múlikterine mindetti baǵalaý júrgizbegeni jáne sonyń saldarynan salyq tólemderin tolyq kólemde aýdarmaǵany belgili boldy.
– Prokýrorlyq tekseris barysynda jyljymaıtyn múlikke mindetti baǵalaý júrgizbeı, sonyń saldarynan bıýdjetke salyqty tolyq tólemeı kelgen 36 kásipker anyqtaldy, – dep habarlady prokýratýra.
Qadaǵalaý organynyń málimetinshe, jekelegen kásipkerler kommertsııalyq nysandarynyń qunyn tómendetip kórsetse, keıbiri múlik salyǵyn ýaqytynda tóleý mindetin oryndamaǵan.
Prokýratýranyń yqpal etý sharalarynan keıin memleket kirisine qomaqty qarjy óndirilgen.
– Prokýratýranyń aralasýynan keıin memleket qazynasyna 2,6 mln teńge óndirildi, – delingen habarlamada.
Sonymen qatar anyqtalǵan zań buzýshylyqtarǵa baılanysty jaýapty tulǵalarǵa da shara qoldanyldy.
– Jiberilgen zańbuzýshylyq úshin salyq organynyń jaýapty qyzmetkeri tártiptik jaýapkershilikke tartyldy, – dep málim etti prokýratýra.
Qadaǵalaý organy memlekettiń ekonomıkalyq múddelerin qorǵaý jáne bıýdjet kiristeriniń tolyq túsýin qamtamasyz etý baǵytyndaǵy jumystar aldaǵy ýaqytta da jalǵasatynyn atap ótti.
Aıta keteıik, salyq organdary zańsyz QQS shemalaryna qarsy baqylaýdy kúsheıtti.
