Atyraý oblysynda kásipkerden 7 mln teńge bopsalaǵan eki kúdikti ustaldy

Atyraý oblysynda kásipkerden 7 mln teńge bopsalaǵan eki kúdikti ustaldy. Kúdiktiler 1 mln teńgeni alý kezinde ustaldy, dep habarlaıdy Kazinform.

Atyraý oblystyq polıtsııa departmentiniń baspasóz qyzmetinen málim etkendeı, jedel izdestirý is-sharasy oblystyq prokýratýranyń úılestirýimen Ulttyq qaýipsizdik komıtetiniń oblystyq departametimen birlese júrgizilgen.

«Quqyq qorǵaý organdarynyń birlesken is-sharasynyń nátıjesinde Maqat aýdanynda kásipkerden 2,5 mln teńge qarajatty qorqytyp alý deregi anyqtalǵan. Osyǵan baılanysty 35 jáne 34 jastaǵy eki kúdikti jábirlenýshiden 1 mln teńge alý kezinde ustalyp, qamaýǵa alyndy. Jınaqtalǵan is-qujattaryna sáıkes ustalǵandar kásipkerden 2023 jylǵy qazan aıynan beri bopsalaý arqyly jalpy somasy 4,5 mln teńgeni zańsyz ıemdegeni úshin kúdikke ilindi», dep habarlady departamenttiń baspasóz qyzmeti.

Qazir kúdiktilerge qatysty adamdar tobymen birge iri mólsherdegi aqshany qorqytyp alý deregi boıynsha qylmystyq is qozǵaldy. Sotqa deıingi tergeý júrip jatyr.

«Ózge aqparat QR Qylmystyq-protsestik kodekstiń 201-babyna sáıkes jarııalaýǵa jatpaıdy. Konstıtýtsııanyń 77-baby 3-tarmaǵynyń 1-tarmaqshasyna sáıkes adamnyń kináli ekendigi zańdy kúshine engen sot úkimimen tanylǵansha, ol jasalǵan qylmysqa kináli emes dep esepteledi», -dep málim etti departamenttiń baspasóz qyzmeti.

Eske sala ketelik, budan buryn Atyraýda shetel azamatynan aqsha bopsalaǵan kúdiktiler ustalǵanyn jazǵan bolatynbyz.