Atyraý oblysynda qaraqurt shaqqan 485 túıeniń toqsany ólgen

ATYRAÝ. KAZINFORM – Atyraý oblysynda 485 túıeni qaraqurt shaqqan. Oısylqara tuqymynyń 90-y ólgeni anyqtalǵan.

Oblystyq aýyl sharýashylyǵy basqarmasynyń málimetinshe, bıyl eldi mekenderde ýly qaraqurt kóbeıgen. 

«Atyraý oblysynyń aýmaǵynda maýsym-shilde aılarynda 485 túıeni qaraqurt shaqty. Sonyń saldarynan 90 túıe shyǵyn boldy. Sımptomatıkalyq emdeý sharalarynyń nátıjesinde 306 janýar saýyqty. Al 89 túıege áli de emdeý júrgizilip jatyr. Qaraqurt shaqqanan ólgen maldyń ıelerine 65 211,2 myń teńge tólendi», - dep habarlady aýyl sharýashylyǵy basqarmasynan.

Basqarmanyń málimetinshe, ýly jándikterdiń shaǵýynyń aldyn alý, emdeý jáne ólgen janýarlarǵa ótemaqy tóleý bıýdjet qarjysy esebinen qarastyrylmaǵan. Alaıda, soǵan qaramastan jergilikti veterınarlar ýly jándik shaqqan maldy emdeý sharalaryn kúndelikti júrgizip jatyr. 

«Ýly nasekomdardy joıýdy bıýdjet qarjysy esebinen atqarylatyn is-sharalar tizbesine qosý boıynsha sharalar qabyldaý týraly Aýyl sharýashylyǵy mınıstrligine hat joldandy. Mal ıelerine ýly jándikter kóp taraǵan jaıylymda túıe, jylqy jáne sıyrdy jaıýdan bas tartýdy, aýrý belgileri bilingen janýarlar týraly jedel túrde veterınarlarǵa habarlaý, sondaı-aq emdeý sharalary júrgizilip jatqan janýarlardy kútip-baǵý erejelerin qatań saqtaý eskertildi», -dep málim etti basqarmadan. 

Eske sala ketelik, buǵan deıin qaraqurt shaqqan atyraýlyq azamatqa kórshi el aýrýhanasynda kómek kórsetilgenin jazǵan bolatynbyz. 

Sondaı-aq, Atyraýda qaraqurt shaqqan 13 adam aýrýhanaǵa túsken edi.