Atyraý oblysynda ınternet jelisine qosylmaǵan 19 aýyl bar
Atyraý oblysynda 153 aýyl bar. Onyń ishinde 19 eldi meken ınternet jelisine áli qosylmaǵan, dep habarlaıdy Kazinform.
Atyraý oblysynda baılanys operatorlarymen telekommýnıkatsııa jelisin damytý jospary talqylandy. Oǵan oblys ákimi Serik Shápkenov pen «Qazaqtelekom» AQ-nyń basqarma tóraǵasy Qýanyshbek Esekeev, salalyq mekemeniń ókilderi qatysty.
«Qazaqtelekom» AQ departamentiniń dırektory Ersaıyn Dúısemalıevtiń aıtýynsha, aımaqta 153 eldi mekenniń 134-i ınternet jelisimen qamtylǵan. Al, turǵyndar sany 50-den az 19 eldi mekendi 2024-2025 jyldary ınternet jelisine qosý josparlanǵan.
«Bıyl josparǵa sáıkes abonentterdiń mys jelilerin optıkalyq jelige aýystyrý jumystary júrip jatyr. Bul tutynýshylar 500 Mbıt/s jyldamdyqpen Internetke, ID TV teledıdary men tsıfrlyq servısine, ІR telefonııaǵa qosylýǵa múmkindik beredi. Atyraý qalasynda optıkalyq jelilerdiń úlesi 60%-ǵa, Qulsary qalasynda 10-nan 37%-ǵa deıin ulǵaıady. 2024 jylǵa bólingen qarjyǵa Aqjar, Talqaıran, Besikti aýyldarynyń abonentterin tolyq optıkalyq jelige aýystyrý josparlanyp otyr. Oblys ortalyǵynda 5500 abonent mys jelisinen optıkaǵa aýysady. Buǵan salynǵan ınvestıtsııa qarjysy – 162 mln teńge», - dep habarlady Ersaıyn Dúısemalıev.
Oblys ákimi Serik Shápkenov 3G bazalyq stansasy qosylmaǵan eldi mekenderdi ınternetpen qamtý úshin kompanııa men ákimdik arasynda birlesken baǵdarlama jasaýdy usyndy. Bilim berý jáne densaýlyq saqtaý mekemelerin kelesi jyly 100% optıkalyq jelimen qamtýdy tapsyrdy.
«Qazir tsıfrlyq telekommýnıkatsııalyq qyzmetterge suranys artyp otyr. Eldi mekenderdiń turǵyndardyń basym bóligi ınternet jelisi jyldamdyǵynyń tómendigine, keıbiri múlde joqtyǵyna shaǵym aıtady. Biz de sapanyń jaqsarǵanyn qalaımyz. Oblysta 3G bazalyq stansa qosylmaǵan 19 eldi meken bar. Bul eldi mekende abonent az shyǵar. Bul kompanııa úshin tıimsiz bolar. Sol sebepten, ákimdikpen birlesken baǵdarlama daıyndap, optıkalyq jeli júrgizeıik», - dedi Serik Shápkenov.
Jıyn sońynda oblys ákimi Serik Shápkenov pen «Qazaqtelekom» AQ basqarma tóraǵasy Qýanyshbek Esekeev óńirde baılanys jáne ınternet sapasyn arttyrý týraly memorandýmǵa qol qoıdy.
«Óńirdegi jelilik ınfraqurylymdy damytý, turǵyndardy zamanaýı telekommýnıkatsııalyq qyzmetpen, servıspen qamtamasyz etý, sondaı-aq 5G jelisin damytý jospary talqylandy. Qazir «Qazaqtelekom» kompanııalar toby besinshi býynnyń Atyraý oblysynda 8 bazalyq stansasyn ornatty. Jyldyń sońyna deıin taǵy 8 bazalyq stansasyn ornatý josparlanyp otyr. Kelesi jyly 5G bazalyq stansasynyń sany 40-qa jetkiziledi. Oblys turǵyndaryn jyldamdyǵy joǵary ınternetpen, sapaly baılanyspen qamtamasyz etý úshin jeliler jańǵyrtylady», - dep málim etti Qýanyshbek Esekeev.
