Atyraý oblysynda Gaz separatsııalaý kesheniniń qurylysy resmı túrde bastaldy
ASTANA. KAZINFORM — Atyraý oblysynda Gaz separatsııalyq kesheniniń (GSK) qurylysy resmı túrde bastaldy.
19 qarasha kúni Teńiz ken ornynyń óndiristik-tehnıkalyq alańynda alǵashqy qada qaǵý rásimi ótti. Qurylys aıasynda 22 myńǵa deıin qada qaǵý josparlanǵan. Barlyq qada ónimderi qazaqstandyq óndirýshilerden satyp alynady.
Jobany «QazMunaıGaz» UK» AQ-nyń enshiles kompanııasy – «KMG PetroChem» JShS júzege asyryp jatyr. Jylyna 9,1 mlrd m³ qurǵaq gaz óńdeýge múmkindik beretin keshen Qazaqstandaǵy gaz-hımııa ınfraqurylymyn keńeıtýdiń jańa kezeńin bildiredi. GSK – polıetılen óndiretin «Sılleno» zaýytyn turaqty etanmen qamtamasyz etetin negizgi býyn bolyp tabylady.
Gaz separatsııalaý kesheniniń iske qosylýy óńirde turaqty shıkizat bazasyn qalyptastyrýmen qatar, joǵary qosylǵan quny bar ónim óndirisin arttyrýǵa múmkindik beredi. Joba elimizdiń munaı-gaz hımııasy klasterin damytý jáne óńdelgen ónim eksportyn ulǵaıtý jónindegi strategııalyq mindetterdi júzege asyrýǵa naqty úles qospaq.
Joba sheńberinde qazaqstandyq qamtý úlesin arttyrýǵa erekshe kóńil bólinedi. Qurylys jumystarynyń eń qarqyndy kezeńinde Atyraý jáne Mańǵystaý oblystarynyń turǵyndary úshin 3 500-ge deıin ýaqytsha, sondaı-aq 400 turaqty jumys orny ashylady.
Sonymen birge otandyq kásiporyndar ınertti materıaldar men metall konstrýktsııalaryn jetkizýmen qatar, negizgi elektr-tehnıkalyq jabdyqtardy – 7 modýldik qosalqy stantsııa, 62 transformator, 220 kV ashyq taratý qurylǵysy, sondaı-aq propan saqtaýǵa arnalǵan kóldeneń býllıtter men tórt iri tehnologııalyq kolonnany daıyndaýǵa jáne ornatýǵa tartylady.
Qazaqstandyq qamtý úlesin arttyrý maqsatynda búgin «KMG PetroChem» JShS EPC-merdiger Tecnimont, CCIC jáne PetroCouncil qaýymdastyǵymen birlesip, GSK jobasyndaǵy jergilikti qamtý jóninde forým uıymdastyrdy. Іs-sharaǵa shamamen 400 qatysýshy: otandyq óndirýshiler, jetkizýshiler, memlekettik organdar men salalyq uıymdar ókilderi qatysyp, GSK jobasy sheńberindegi kooperatsııa tetikterin jan-jaqty talqylady.
Aıta keteıik, Prezıdent «Reseı — Qazaqstan — Ózbekstan» gaz jobasy tabysty nátıje kórsetkenin aıtty.