Atyraý oblysynda ǵasyr jasaǵan keıýanalar daýys berdi
ATYRAÝ. KAZINFORM - Atyraý oblysynyń birqatar aýdanynda referendým naýqanyna turǵyndar belsendi qatysyp jatyr. Ásirese el bolashaǵyna beıjaı qaramaıtyn aǵa býyn ókilderiniń belsendiligi kópshilikke úlgi bolyp otyr.
Inder jáne Jylyoı aýdandarynda júz jasaǵan tyl ardagerleri daýys berip, el taǵdyryna qatysty mańyzdy sheshimnen shet qalmaıtyndaryn kórsetti.
Inder aýdanynda 1926 jyly dúnıege kelgen tyl ardageri Erkesh Jeksenǵalıeva referendým barysynda óz tańdaýyn jasady. Ol ómir jolynda eńbekqorlyǵymen, tabandylyǵymen elge úlgi bolǵan jan.
Erkesh apa eńbek jolynda Dossormunaıgaz mekemesinde munaı jınaqtaý jáne aıdaý ýchaskesiniń mashınısi bolyp qyzmet atqarǵan. Eńbek maıdanyna erte aralasqan ol nebári 14 jasynan bastap Atyraý qalasy men Inderbor arasynda at jegip, bóshkemen maı tasyp, aýyr eńbekpen elge qyzmet etken.
1949 jyly Bernııazov Mansaraı atamen shańyraq kóterip, ónegeli otbasy qurdy. Erli-zaıyptylar úsh ul, bir qyz tárbıelep ósirdi. Búginde Erkesh apanyń úlken áýleti qalyptasqan: 14 nemere-jıeni, 37 shóberesi bar.
Inder aýdanynda taǵy bir ǵasyr jasaǵan keıýana – Muqanqyzy Monshaq ta referendýmǵa qatysyp, óz daýysyn berdi. Ol 1926 jyldyń 1 maýsymynda dúnıege kelgen. Qarııa eldegi mańyzdy saıası naýqannan tys qalmaı, azamattyq belsendilik tanytty.
Al Jylyoı aýdany turǵyndary da daýys berý naýqanyna belsendi qatysyp jatyr. Referendýmǵa qatysqandardyń qatarynda jýyrda ǵana 100 jasqa tolǵan tyl ardageri Ýnzıra Ábilǵazıeva bar.
Aq jaýlyqty ana densaýlyǵyna baılanysty daýys berý úshin ýchaske múshelerin úıine shaqyrdy. Osyǵan oraı «Keń Jylyoı» mádenıet úıi ǵımaratynda ornalasqan №94 referendým ýchaskesiniń músheleri qarııanyń úıine arnaıy baryp, daýys berý rásimin zań talaptaryna sáıkes uıymdastyrdy.
Ǵasyr jasaǵan ardager úshin el taǵdyryna qatysty mańyzdy sheshimderden shet qalmaý – azamattyq borysh. Qarııanyń aıtýynsha, árbir azamat eldiń erteńi úshin óz tańdaýyn jasap, qoǵamdyq mańyzy bar naýqanǵa qatysýy tıis.
Atyraý oblysynyń ár aýdanynda ótip jatqan referendýmda aǵa býyn ókilderiniń belsendiligi erekshe baıqalady. Uzaq ǵumyr keshken ardagerlerdiń el bolashaǵyna beıjaı qaramaı, daýys berýge qatysýy jastarǵa úlgi bolyp otyr.
Ómirin eńbekpen órgen qarııalardyń azamattyq ustanymy – el birligi men jaýapkershiliktiń aıqyn kórinisi. Referendým barysynda osyndaı ónegeli jandardyń qatysýy qoǵamdaǵy birlik pen yntymaqtyń nyǵaıa túsýine yqpal etedi.