Atyraý oblysynda eńbek zańdylyǵyn buzýǵa qatysty 229 derek anyqtaldy

Atyraý oblysynda memlekettik eńbek ınspektorlary eńbek zańdylyǵyn buzýǵa baılanysty 229 derekti anyqtady, dep habarlaıdy QazAqparat tilshisi.

Atyraý oblystyq memlekettik eńbek ınspektsııasy basqarmasy basshysynyń orynbasary Dýman Ábeýovtiń aıtýynsha, shaǵymdarǵa shaǵymdardy zerdeleý úshin 184 tekserý júrgizilgen.

«Onyń ishinde 45 tekserý sheteldik jumys kúshin tartatyn iri kásiporyndar baılanysty bolyp otyr. Tekserýdiń nátıjesinde eńbek zańnamasyn buzǵan 229 derek anyqtalyp, 81 ákimshilik hattama toltyryldy», -dep habarlady Dýman Ábeýov.

Bıyl Atyraý oblystyq memlekettik eńbek ınspektsııasy basqarmasyna 1 567 ótinish tirkelgen. Ótinishtiń 1 417-i qaralyp, 864 adamyń eńbek qatynastaryna qatysty konstıtýtsııalyq quqyǵy qorǵalǵan.

«Eńbek kodeksiniń talabyn buzýǵa baılanysty zańsyzdyqty joıý úshin arnaıy 99 uıǵarym engizildi. Eńbek ınspektorlary 2 234 adamǵa quqyqtyq túsindirý jumysyn júrgizdi», -dep málim etti Dýman Ábeýov.

Eske sala ketelik, budan buryn Atyraýda keı kompanııalar jumysshylarǵa jalaqysyn bermeı kelgenin habarlaǵan edik.

«Jylyoı aýdanynyń prokýratýrasy jumysshylardyń eńbek quqyǵyn buzý deregin anyqtady. «Batys Teh Invest» JShS-niń jumysshylaryna eńbekaqyny tólemeý, sondaı-aq «JylyoıSý» MKK men Teńiz ken ornynda «InterTasko» JShS-niń jumysshylaryna zeınetaqy jáne áleýmettik aýdarymdary jasalmaı kelgen. Prokýrorlyq qadaǵalaý aktileri negizinde 180 jumysshyǵa 32 mln teńge kóleminde eńbekaqy bereshegi óteldi. Al, 744 jumysshyǵa 48 mln teńge kóleminde zeınetaqy jáne áleýmettik aýdarymdary óndirildi», -dep habarlaǵan edi oblystyq prokýratýranyń baspasóz qyzmeti.