Atyraý oblysynda elektr energııasyn qalpyna keltirýge 40 arnaıy brıgada jumyldyryldy
ATYRAÝ. KAZINFORM — Atyraý oblysy aýmaǵynda 14 jeltoqsanda aýa raıynyń kúrt buzylýynan keı ýchaskelerde elektr energııasyn berý ýaqytsha toqtady. Qazirgi ýaqytta apattyń 85 paıyzy tolyqtaı qalypqa keltirildi. Bul týraly «Atyraý Jaryq» JShS basshysy Meıirbek Gýbashev málimdedi.
— Oblys kóleminde apatty jaǵdaılardy joıý maqsatynda 40 arnaıy brıgada kúsheıtilgen rejımde jumys istep jatyr. Magıstraldyq jáne jeke turǵyn úılerge tartylǵan jelilerdi qalpyna keltirý jumystary parallel túrde júrgiziledi. Elektrmen jabdyqtaý júıesin keshke deıin tolyq qalpyna keltirýdi josparlaýdamyz, - dedi M. Gýbashev.
Búginde «Atyraý Jaryq» mekemesi kúsheıtilgen rejımde qyzmetin jalǵastyryp jatyr. Elektr energııasyna qatysty ótinimder men habarlamalar 109 biryńǵaı baılanys ortalyǵy arqyly qabyldanady.
Eske sala keteıik, buǵan deıin Atyraýdaǵy dúleı daýyl turǵyn úılerdiń shatyryn ushyryp, elektr jelilerin qıratqanyn jazǵanbyz. Sondaı-aq Atyraý oblysynda mektep oqýshylary onlaın formatqa kóshirildi.