Atyraý oblysynda eki kúnde jol qozǵalysy erejesi 2184 márte buzylǵan

ATYRAÝ. KAZINFORM – Atyraý oblysynyń polıtseıleri eki kúnde jol qozǵalysy erejesin buzǵan 2184 derek anyqtalǵan.

Atyraý oblystyq polıtsııa departamentiniń baspasóz qyzmetinen málim etkendeı, 8-10 qarasha aralyǵynda «Qaýipsiz jol» jedel-profılaktıkalyq is-sharasy ótkizilgen. 

«Bul is-shara kezinde qoǵamdyq tártipti saqtaý, jol qozǵalysy qaýipsizdigin qamtamasyz etip, erejelerdi óreskel buzýdyń jáne jol-kólik oqıǵalarynyń aldyn alýǵa nazar aýdaryldy. Eki kúnde jol qozǵalysy erejesin buzýdyń 2184 deregi anyqtaldy. Quqyq buzýshylardyń 85 avtokóligi arnaýly turaqqa qoıyldy», - dep habarlady departamenttiń baspasóz qyzmeti. 

Anyqtalǵan quqyq buzýshylyqtyń arasynda elimizdegi mindetti saqtandyrý týraly zańnamany buzýdyń 191, memlekettik tirkeý nómiri belgileri joq nemese paıdalanýǵa tyıym salynǵannan keıin nemese belgilengen tártippen tirkelmegen kólik quralyn júrgizýdiń 56 deregi bar. Al, 45 adam tıisti ruqsatsyz qaıta jabdyqtalǵan kólik quralyn aıdap júrgen. Memlekettik nemese mindetti tehnıkalyq qarap-tekserýden ótpegen kólik quralyn 158 adam júrgizgen. 

Sondaı-aq, kólik rýlindegi 46 júrgizýshi telefondy ne radıostantsııany paıdalanǵan. Al, 1010 júrgizýshi belgilengen júrý jyldamdyǵyn arttyrǵan. Alkogoldik ishimdik ishken 9 júrgizýshi kólik rýline otyrsa, 5 adam kólikpen joldyń qarsy baǵytyna shyǵyp ketken. 

«Jol júrisi qaǵıdalarynda kózdelgen jolaýshylardy jáne júkterdi tasymaldaý, qaýipsizdik beldikterin nemese motoshlemderdi paıdalaný jónindegi talaptardy saqtamaýǵa qatysty 224 derek tirkeldi. Júrgizýshi kýáligi joq 30 adamnyń rýlge otyrǵany anyqtaldy», -dep málim etti departamenttiń baspasóz qyzmeti. 

Eske sala ketelik, budan buryn Atyraýda jyl basynan beri quqyq buzǵan 7 207 jasóspirim polıtsııaǵa jetkizilgenin habarlaǵan edik.