Atyraý oblysynda eki brakonerden iri kólemde balyq tárkilendi
ASTANA. KAZINFORM - Kúdiktilerden 107 kelige jýyq qara balyq tabyldy. Bul týraly Jaıyq-Kaspıı oblysaralyq basseındik balyq sharýashylyǵy ınspektsııasy habarlady.
Vedomstvo qyzmetkerleri brakonerlik faktilerdiń jolyn kesý maqsatynda júrgizilgen reıd barysynda memlekettik nómiri joq «Ýral» mototsıklindegi 1986 jáne 1992 jyly týǵan eki azamatty toqtatty. Brakonerler Qurmanǵazy aýdany Jarqos degen jerde Sharon ózeniniń jaǵasynda ustaldy.
- Mototsıklden kókserke, sazan, aqmarqa, taban, móńke, qarakóz tabyldy - qapshyqtarǵa salynǵan balyqtyń jalpy salmaǵy 107,5 keli boldy. Balyqpen birge tyıym salynǵan aýlaý quraldary: alty dana tor, úsh ilmek, súımen jáne balta boldy, - dep túsindirdi vedomstvo.
Oqıǵa ornynda Qurmanǵazy aýdandyq polıtsııa bóliminiń jedel-tergeý toby jumys istep, tártip buzýshylar ustalǵan jerde protsessýaldyq is-sharalar júrgizdi.
Balyq resýrstaryna keltirilgen shyǵyn shamamen 663 myń 287 teńgeni quraıdy.
Brakonerlik deregi QR Qylmystyq kodeksiniń 335-babynyń 3-bóligi, 4-tarmaǵy boıynsha sotqa deıingi tergep-tekserýdiń biryńǵaı tizilimine tirkeldi. Quqyq qorǵaý organdary sotqa deıingi tergeý amaldaryn júrgizýde.
