Atyraý oblysynda eki aýyl arasyndaǵy jyrylǵan jol jóndeldi

ATYRAÝ. KAZINFORM – Atyraý oblysynyń Mahambet aýdanynda eki aýyl arasyndaǵy jyrylǵan jol qalpyna keltirildi. Kólik qozǵalysyna ruqsat berildi.

Aýdan ortalyǵy — Mahambet pen Sarytoǵaı aýyldary aralyǵyndaǵy jyrylǵan jol qalpyna keltirilip, nyǵaıtý jumysy júrip jatyr. 

«Aýdandyq jedel shtabtyń sheshimimen sý mólsherin retteý, aýyldy tasqynnan qorǵaý maqsatynda arnaıy tehnıkalardyń kómegimen aýylaralyq jol buzylǵan edi. Jolǵa uzyndyǵy — 11, eni — 1,5 metrlik 2 turba salyndy. Qazir eki turba mańyna qum toltyrylǵan 1 tonnalyq qaptar tóselip, nyǵaıtý jumysy júrip jatyr. Bul jumysty atqarýǵa aýyldyń azamattary jumyldy», -deıdi aýyl turǵyny Sultan Bekbasarov.

Mahambet aýdandyq tótenshe jaǵdaı jónindegi jedel shtabtyń hatshysy Seıitjan Qujyrbaevtyń aıtýynsha, tasqyn sý basý qaýpi bar úılerdiń mańyna topyraq tógilgen.

«Aýdandyq jedel shtabqa sýdan qorǵaý bógetteriniń ortasynda qalǵan úılerdiń turǵyndary ótinishin jetkizdi. Shtab ókilderi jedel áreket etip, arnaıy 8 júk tıegish tehnıka bóldi. Turǵyn úılerdiń aýlasynyń jan-jaǵyna topyraq tógilip, tasqyn sýdan qorǵaý jumysy júrgizildi. Qazir bógetterge beket qoıylyp, táýlik boıy kezekshilik jasalyp jatyr», -dedi Seıitjan Qujyrbaev.

Eske sala ketelik, budan buryn Atyraý oblysynda eki aýyldyń arasyndaǵy jol jyrylyp, qatynas ýaqytsha toqtaǵanyn habarlaǵan edik.