Atyraý oblysynda eki aýdan halqynyń nesıesi keıinge shegeriledi

ATYRAÝ. KAZINFORM — Atyraý oblysynda sý tasqynyna baılanysty eki aýdan turǵyndarynyń nesıe tólemi keıinge shegeriledi.

Oblystyq jedel shtabtyń málimetine súıensek, sý tasqynynan sýdan zardap shekken turǵyndardyń basym bóligi Jylyoı aýdanynda turady.

Bul aýdandaǵy Qulsary qalasynyń 30 paıyzyn sý basqan. 

Qarjy naryǵyn retteý jáne damytý agenttigi Atyraý oblystyq departamentiniń basshysy Aslanbek Qabesovtiń aıtýynsha, jergilikti atqarýshy organ zardap shekken adamdardyń tizimin usynyp jatyr. 

«Jylyoı aýdanyndaǵy Qulsary qalasy boıynsha sý tasqynynan zardap shekken 2471 adamnyń tizimi jasaqtalyp, qarjy uıymdaryna joldandy. Al, Qyzylqoǵa aýdanynan 24 adamnyń tizimi tústi. Osyǵan baılanysty zardap shekken turǵyndardyń nesıesine qatysty tólemin 3 aıǵa toqtatý jóninde jumystar júrgizilip jatyr», -dep málim etti Aslanbek Qabesov. 

Onyń aıtýyna qaraǵanda, sý tasqynynan zardap shekken adamdardyń nesıe tóleminiń merzimi 1 sáýirden 30 maýsymǵa deıin shegeriledi.

Osy kezde tólemdi keshiktirgeni úshin aıyppul men ósimpul eseptelmeıdi. 

Eske sala ketelik, buǵan deıin Jylyoı aýdanynda 1866 otbasy bir rettik áleýmettik kómek qarjysyn alǵanyn habarlaǵan bolatynbyz.