Atyraý oblysynda bir kúnde jol apatynan 5 adam mert boldy

ATYRAÝ. KAZINFORM — Atyraý oblysynda bir kúnde jol-kólik oqıǵasy saldarynan 5 adam kóz jumdy.

Atyraý oblystyq polıtsııa departamentiniń baspasóz qyzmeti aqparatyna qaraǵanda jol apaty 15 sáýirde tirkelgen. 

— Polıtsııa qyzmetkerleri táýlik boıy jol qozǵalysyn qadaǵalap, júrgizýshilerge qaýipsizdikti saqtaýdy túsindirip keledi. Degenmen, júrgizýshiler jol qozǵalysy erejelerin óreskel buzýy azaımaı otyr. Máselen, 15 sáýirde tirkelgen birneshe jol-kólik oqıǵasy saldarynan 5 adam kóz jumdy. Tańǵy saǵat 05:45 shamasynda Toyota Camry markaly kóligi aýdarylyp, 3 adam qaza tapty. Taǵy bir jolaýshy aýyr jaǵdaıda aýrýhanaǵa jetkizildi. Sol kúni saǵat 15:30 shamasynda Saǵyz aýylynda jasóspirim motokólikpen baǵanaǵa soǵylyp, aýyr jaraqat aldy. Ol aýrýhanada kóz jumdy. Al saǵat 16:40 shamasynda Dossor-Qulsary tas jolynyń 93-shaqyrymynda júk jáne VAZ-2115 kólikteri soqtyǵysyp, 1 adam oqıǵa ornynda qaıtys boldy, — dep habarlady departamenttiń baspasóz qyzmeti.

Eske sala keteıik, Atyraýda jyl basynan beri 100 myńǵa jýyq quqyq buzýshylyq anyqtalǵanyn habarlaǵan bolatynbyz.