Atyraý oblysynda bir kúnde kóligi batpaqqa batqan 15 adam qutqaryldy
ATYRAÝ. KAZINFORM — Atyraý oblysynda bir kúnde úsh kólik batpaqqa batyp qalǵan. Úsh kólikte 15 adam bolǵan, onyń ishinde 8 bala bar.
Atyraý oblystyq tótenshe jaǵdaılar departamenti qoǵammen baılanys tobynyń málimetinshe, keshe, 11 aqpanda Isataı aýdanyna qarasty qystaqtyń birinen úsh kólik Tuşyqudyq aýylyna qaraı baǵyt alǵan.
«Alaıda, úsh kóliktegi jolaýshylar jolda batpaqqa batyp, júre almaı qalǵan. Bul týraly Isataı aýdandyq №6 órt sóndirý bóliminiń baılanys beketine saǵat 23:10-da shaqyrtý tústi. Dalada qalǵan jolaýshylardy qutqarý úshin órt sóndirý bólimi men jergilikti atqarýshy organnyń 5 qyzmetkeri 2 arnaıy tehnıkamen jolǵa shyqty. Batpaqqa batqan úsh avtokólik Tuşyqudyq aýylynan 20 shaqyrym qashyqtyqtan tabyldy. Qutqarýshylar 15 adamdy, onyń ishinde 8 balany Tuşyqudyq aýylyna evakýatsııalady. Qutqarylǵan adamdar medıtsınalyq kómekti qajet etpedi», - dep habarlady departamenttiń qoǵammen baılanys toby.
Eske sala ketelik, budan buryn Atyraý oblysynda Noǵaıty ózeniniń arnasy kóterilip, taǵy bir aýylda saı tasyp jatqanyn habarlaǵan edik.
Keıin Muqyr aýylynda tasyǵan saı sýy 40 úıge qaýip tóndirýi múmkin ekenin jazǵan bolatynbyz.
