Atyraý oblysynda bir aptada jasóspirimderge qatysty 427 quqyqbuzýshylyq anyqtaldy

ATYRAÝ. KAZINFORM – Atyraý oblysynda jasóspirimder túnimen kóshede, oıyn-saýyq ortalyǵynda qydyryp júrgeni anyqtalyp otyr.

Atyraý oblystyq polıtsııa departamenti baspasóz qyzmetiniń aqparatyna qaraǵanda, 28 qazannan beri «Kanıkýl» jedel-profılaktıkalyq is-sharasy ótkizilgen. 

«Atalǵan is-sharany ótkizýdegi maqsat – kámeletke tolmaǵandar jasaýy múmkin jáne olarǵa qarsy quqyq buzýshylyqtardyń aldyn alý. Іs-shara kezinde 427 quqyq buzýshylyq anyqtaldy. Onyń ishinde QR Ákimshilik quqyq buzýshylyq týraly kodeksiniń 442-babynyń 2-bóligimen (Kámeletke tolmaǵandardyń zańdy ókilderiniń erip júrýinsiz túngi ýaqytta turǵyn jaıdan tys bolýy) 359 derek tirkeldi. Al, 127-babynda kózdelgen ata-analyq mindetterin tıisti deńgeıde atqarmaǵany úshin 13 adamǵa, 132-babynyń talabyn saqtamaı, kámeletke tolmaǵandardyń túngi ýaqytta oıyn-saýyq mekemelerinde bolýyna jol bergen 10 ata-anaǵa hattama toltyryldy», - dep habarlady departamenttiń baspasó zqyzmeti. 

Sondaı-aq, alkogol ónimin ótkizý jónindegi talapty buzǵan 9, kámeletke tolmaǵan 2 jasóspirim jasaǵan buzaqylyq deregi tirkelgen. Úıinen shyǵyp, iz-túzsiz joǵalǵan 3 jasóspirim tabylyp, ata-analaryna tabystalǵan. 

«Ata-analarǵa jasóspirimderdiń túngi mezgilde kóshe shyǵýyna tyıym salýdy eskertemiz. Jasóspirimderdiń beımezgil ýaqytta kompıýterlik oıyn-saýyq oryndaryna barýy, qoǵamdyq oryndarda qaraýsyz júrýi qaýipti ekenin esten shyǵarmaǵan jón», - dep málim etti departamenttiń baspasóz qyzmeti.

Eske sala ketelik, budan buryn Atyraýda ıtti uryp, órtep óltirgen eki adamnyń bas bostandyǵy 6 aıǵa shektelgenin habarlaǵan bolatynbyz.