Atyraý oblysynda boryshkerler 162 mln teńgeniń bereshegin tólemeı júr
ATYRAÝ. KAZINFORM – Atyraý oblysynyń sot oryndaýshylaryna 9640 boryshkerden alımentti óndirý týraly qujat túsken. Qazir boryshkerler 162 mln teńgeniń bereshegin tólemeı júr.
Atyraý oblystyq ádilet departamenti májbúrlep oryndatý aýmaqtyq bóliminiń basshysy, aǵa sot oryndaýshy Saltanat Qojanovanyń aıtýynsha, alımentten jaltarǵandardy anyqtaý boıynsha birlesken reıdtik is-shara bastaldy.
Reıd kezinde sot aktilerin oryndamaǵan boryshkerler tekseriledi. Birlesken reıdke ádilet, polıtsııa jáne memlekettik kirister departamentiniń, jeke sot oryndaýshylary óńirlik palatasynyń qyzmetkerleri tartylǵan.
«Atalǵan reıdtiń maqsaty — atqarýshylyq qujattardyń oryndalýyn júzege asyrý. Alıment tólemi boıynsha jaltaryp júrgen boryshkerlerdi izdestirip, mekenjaıy anyqtalady. Boryshkerdiń jyljymaly múlikteri arnaıy aıyppul turaǵyna qoıylady», -deıdi Saltanat Qojanova.
Onyń aıtýyna qaraǵanda, mundaı reıd toqsan saıyn júrgiziledi.
Jyl basynan beri jeke sot oryndaýshylarynyń usynysymen Ákimshilik quqyq buzý kodeksiniń 669-babyna sáıkes 53 boryshker ákimshilik jaýapkershilikke tartylǵan. Óıtkeni, olar alıment tóleýden jaltarǵan.
«Atyraý oblysy boıynsha memlekettik jáne jeke sot oryndaýshylaryna 9640 adamnan alıment óndirý týraly atqarý qujaty tústi. Onyń ishinde 5199 adamnyń qujaty merzimdi oryndalý satysynda tur. Olardyń jalaqysynan tıisti qarjy ustalady. Al, 1875 boryshker alımentti óz erkimen tóleıdi. Alıment tóleýden jaltaryp júrgender sany — 2566 adam. Jalpy boryshkerlerdiń qaryzy 162 mln 363 myń 872 teńgeni quraıdy», -dep málim etti Saltanat Qojanova.
Eske sala ketelik, budan buryn Atyraý oblysynda 4 kásiporyn jumysshylarǵa 33 mln teńge jalaqy qaryz ekenin jazǵan bolatynbyz.
