Atyraý oblysynda byltyrǵy sý tasqynynan búlingen jolda kópir paıdalanýǵa berildi
ATYRAÝ. KAZINFORM – Byltyrǵy sý tasqyny Qyzylqoǵa aýdanynyń birneshe aýylyna qatynaıtyn joldy shaıyp ketken edi. Bir jyldan soń jańa kópir paıdalanýǵa berildi.
Atyraý oblystyq jolaýshylar kóligi jáne avtomobıl joldary basqarmasy basshysynyń mindetin atqarýshy Erjan Haınollaevtyń aıtýynsha, jańa Qyzylqoǵa jáne Inder aýdanynyń aralyǵyndaǵy kólik qalpyna keltirýge jol ashty.
– Jańa ınfraqurylymdyq joba aýdan ortalyǵy men Jangeldın, Jasqaırat, Kózdiǵara, Tasshaǵyl, Jambyl, Qarabaý aýyldaryna, Inder aýdanyna qatynaıtyn kólik qozǵalysyn retteýge múmkindik berip otyr. Óıtkeni, byltyrǵy kóktemde sý tasqyny saldarynan aýdan ortalyǵy men birneshe aýyldyq okrýg arasyndaǵy joldyń bir bóligi búlinip, kólik qatynasy ýaqytsha toqtaǵan bolatyn. Osy kezeńde turǵyndar aýdan ortalyǵy men aýyldar aralyǵyna tek aınalma jol arqyly qatynap keldi. Endi bul másele tolyǵymen sheshimin tapty, - deıdi Erjan Haınollaev.
Kópir qurylysyn «Atyraýınjstroı» JShS júrgizgen. Kompanııa basshysy Ádilbek Nurlyǵojıevtyń aıtýynsha, kópirdiń jalpy uzyndyǵy – 580 metr.
– Byltyr shildede bastalǵan kópir qurylysy barlyq standart pen tehnıkalyq talapqa sáıkes salyndy. Kópirge zamanaýı asfalt jabyny tóselip, jaryq baǵanalary ornatyldy. Jol qozǵalysyn retteýge arnalǵan arnaıy belgiler ornatylyp, syzba jolaqtar júrgizildi. Jaıaý júrginshilerge jáne sý ótkizýge ótkelder salyndy, - deıdi Ádilbek Nurlyǵojıev.
Eske sala ketelik, budan buryn Qulsaryda sý tasqyny saldarynan búlingen kópir qaıta jańǵyrtylǵanyn habarlaǵan edik.