Atyraý oblysynda byltyr tabıǵatty búldirýshilerge 42 mlrd teńge aıyppul salynǵan

ATYRAÝ. KAZINFORM – Byltyr Atyraý oblysynda qorshaǵan ortany lastaýshylarǵa salynǵan aıyppul kólemi 42 mlrd teńgeden asqan. Osy kezge deıin aıyppuldyń 26,1 mlrd teńgesi óndirilgen.

Ekologııa jáne tabıǵı resýrstar vıtse-mınıstri Jomart Álıevtiń pikirinshe, Atyraý oblysynda ekologııalyq ahýaldy jaqsartýǵa baǵyttalǵan sharalar kesheni júzege asyrylyp jatyr.

– Atyraý oblysynda qaýiptiligi І sanatqa jatatyn 83 kásiporyn jumys isteıdi. Onyń ishinde qorshaǵan ortany lastaıtyn negizgi kompanııalar qataryna «Teńizshevroıl», «NCOC», «Embimunaıgaz» AQ men «Atyraý JEO» AQ enip otyr. Byltyr qorshaǵan ortany qorǵaý zańdylyǵynyń saqtalýyna 45 márte tekseris júrgizildi. Tekserý qorytyndysymen 101 zańbuzýshylyq anyqtaldy. Tabıǵattyń tazalyǵyn búldirgenderge 42 mlrd teńgeden astam aıyppul salyndy. Aıyppuldyń 26,1 mlrd teńgesi óndirildi, - dedi Jomart Álıev.

Onyń málimetinshe, 5 kompanııaǵa aýa sapasyn baqylaý úshin avtomattandyrylǵan monıtorıng júıesin ornatý kózdelgen. Qazir bul júıeniń 4-eýi iske qosylǵan.

– Elimizdegi ózekti máseleniń qatarynda qaldyqtardy óńdeý de bar. Óńirde 168 zańsyz qoqys orny anyyqtaldy. Osy kezge deıin onyń 125-i joıyldy. Qazir 7 kompanııa qaldyqtardy óńdeý jáne suryptaý jobalaryn júzege asyryp jatyr. Bul jobalardyń jalpy quny 7 mlrd teńgeni quraıdy, -dep málim etti Jomart Álıev.

Eske sala ketelik, buǵan deıin ekologııasy nashar Atyraý oblysynda jasyl jelek qashan kóbeıetinin habarlaǵan bolatynbyz.