Atyraý oblysynda byltyr órtten 12 adam mert bolyp, taǵy 12-si zardap shekken

ATYRAÝ. KAZINFORM – Atyraý oblysynda byltyr 278 órt oqıǵasy tirkelgen. Jalynnyń saldarynan 12 turǵyn zardap shegip, 12 adam kóz jumǵan.

Atyraý oblystyq Tótenshe jaǵdaılar departamentiniń basqarma bastyǵy Baǵdat Abdýllınniń málimetinshe, órt oqıǵasynyń basym bóligi aýdandarda tutanǵan.

– Órttiń tutanýyna túrli sebep áser etedi. Máselen, elektr jabdyqtaryn montajdaý men tehnıkalyq paıdalaný erejelerin buzýdyń saldarynan 182, otty abaısyz paıdalanýdyń kesirinen 44, qondyrǵy ornatý kezinde órt qaýipsizdigi erejelerin buzý, peshpen jylytýdy durys paıdalanbaýdan 10 jaǵdaı tirkeldi. Al 3 oqıǵaǵa turmystyq gaz qurylǵylaryn qoldaný kezinde órt qaýipsizdigi qaǵıdalarynyń buzylǵany sebep boldy, - deıdi Baǵdat Abdýllın.

Onyń deregine qaraǵanda, órt oqıǵasy barlyq aýdanda tirkelgen. Máselen, Atyraý qalasynda 4, Inder aýdanynda 14, Qurmanǵazyda – 59, Qyzylqoǵa aýdanynda 67 paıyzǵa kóbeıgeni anyqtalǵan. Al Jylyoı aýdanynda 4, Mahambette – 40, Maqat aýdanynda 31 paıyzǵa tómendep otyr.

– Ótken jyly oblys aýmaǵynda 278 órt oqıǵasy tirkeldi. Jalynnyń saldarynan 12 adam kóz jumyp, 12 turǵyn zardap shekti. Al jańa jyldan beri 21 derek tirkelip otyr. Qutqarýshylar 9 turǵyn úı men 7 avtokólik órtti sóndirdi. Baqylaý júrgiziletin nysandarda 5 jalynnyń tutanǵany anyqtaldy, - dep málim etti Baǵdat Abdýllın.

Eske sala ketelik, budan buryn qyzǵanyshtan áıel men 2 balany órtep jibergen atyraýlyq ómir boıyna sottalǵanyn jazǵan edik.