Atyraý oblysynda byltyr 168 zańsyz qoqys alańy anyqtalǵan

ATYRAÝ. KAZINFORM – Byltyr Atyraý oblysynda júrgizilgen ǵaryshtyq monıtorıng kezinde 168 zańsyz qoqys orny anyqtaldy. Onyń 53-i Atyraý qalasynda, al Jylyoı aýdanynda 115 qoqys alańy ornalasqan.

Atyraý oblystyq ekologııa departamentiniń basshysy Asqar Júsipovtiń deregine súıensek, ǵaryshtyq monıtorıngti «Qazaqstan ǵarysh sapary» UK» AQ júrgizgen. 

– Ǵaryshtyq monıtorıng derekterine sáıkes anyqtalǵan zańsyz qoqys oryndarynyń 125-i tolyq tazartyldy. Al 3 oryn zańdastyrylǵan qaldyq polıgony retinde tanyldy. Jergilikti atqarýshy organ 40 aýmaqqa qoqys tastaǵanda jeke tulǵalarǵa shara qoldandy, -dep habarlady Asqar Júsipov.

Onyń aıtýyna qaraǵanda, ekologııalyq ahýaldy jaqsartý úshin qaldyqtardy óńdeý isin qolǵa alý qajet.

– Atyraý oblysynda turǵyndardy alańdatatyn ózekti máseleniń biri – qorshaǵan ortanyń tazalyǵyn saqtaý. Osy oraıda zańsyz qoqys oryndaryn joıý, qaldyqtardy qaıta óńdeý júıesin damytý, ekologııalyq mádenıetti qalyptastyrý baǵytynda jumystar kúsheıtildi. Máselen, «Týhlaıa balka» býlaný alańyn qalpyna keltirý jumystary aıaqtaldy. Al «Kvadrat» býlaný alańyn qalpyna keltirý jobasy júrgizilip, 36 myń 147 tekshe metr lastanǵan tunba tazartyldy. Jaıyq ózeniniń arnasyn tazartýǵa baılanysty ónerkásiptik qaldyqtardy basqarý júıesin jaqsartý úshin kásiporyndarmen ekologııalyq standarttardy kúsheıtý boıynsha kelissózder júrgizilip jatyr, - dep málim etti Asqar Júsipov.

Eske sala ketelik, buǵan deıin Atyraýda kompanııalarǵa salynǵan 42 mlrd teńge aıyppuldyń 26 mlrd teńgesi óndirilgenin habarlaǵan edik.