Atyraý oblysynda bıyl qansha tonna balyq aýlandy
ATYRAÝ. KAZINFORM — Óńirde jyl basynan beri 5530 tonna balyq aýlanyp, onyń 4085 tonnaǵa jýyǵy shetel naryǵyna jóneltilgen.
Naqtyraq aıtqanda, ónim Reseı, Ázerbaıjan, Ýkraına, Grýzııa jáne Germanııa elderine eksporttaldy. Óńirde balyq sharýashylyǵyn damytý aıasynda 2028 jylǵa deıin qosymsha 5 taýarly balyq ósirý jobasyn iske asyrý jáne bir balyq óńdeý zaýytyn jańǵyrtý josparlanǵan.
Onyń ishinde tuıyq sýmen jabdyqtaý júıesi men toǵandarda tuqy tuqymdas balyq ósirýge baǵyttalǵan úsh joba bar. Josparǵa sáıkes, 2027 jyldan bastap qosymsha 400 tonnaǵa deıin balyq ónimin óndirý kózdelip otyr.
— Balyq qoryn saqtaý maqsatynda byltyr Jaıyq ózenine 5 mln dana bekire tuqymdas shabaq jiberilse, jyl basynan kórsetkish 3,7 mln dana boldy, — dep málimdedi oblystyq ákimdik.
Qazir óńirde 18 balyq sharýashylyǵy sýbektisine 31 ýchaske bekitilgen. Qosymsha 27 ýchaske rezervte tur. Balyq sharýashylyǵy kásiporyndary Jaıyq pen Qıǵash ózeni boıynda, Qıǵash ózeniniń saǵalyq keńistiginde, sondaı-aq Kaspıı teńiziniń qazaqstandyq sektorynyń soltústik-shyǵys bóliginde balyq aýlaıdy.
Aıta keteıik, jyl basynan beri Jaıyq-Kaspıı basseıniniń sý aıdyndarynda tabıǵat qorǵaý zańnamasyn buzýdyń 1647 deregi anyqtalǵan.
Buǵan deıin óńirge qarasty Qurmanǵazy aýdanynda kólshikterde qalyp qoıǵan balyq shabaqtarynyń qutqarylyp jatqany jóninde jazǵan edik.
