Atyraý oblysynda belgisiz indetten túıe qyrylyp jatyr

ATYRAÝ. KAZINFORM – Atyraý oblysy Qurmanǵazy aýdanynyń birneshe aýylynda belgisiz indetten túıeler qyrylyp jatyr. Jaýapty mamandar maýsym aıynan beri 200-den asa túıe aýyryp, 84-i qyrylǵanyn rastap otyr. 

Іndet taraǵan Qurmanǵazy aýdanynyń Dyńǵyzyl, Eńbekshi, Maqash aýyldaryndaǵy ahýal kúrdeli. Al turǵyndar mundaı jaǵdaı byltyr da tirkelgenimen mal shyǵyny kóp bolmaǵanyn aıtady.

— Meniń ózimnen qazir 5 analyq túıe, 2 bota óldi. Dárigerler qolynan kelgenshe kómektesip jatyr. Biz tek sol malmenen kún kórip otyrmyz, — deıdi Dyńǵyzyl aýylynyń turǵyny Fazılıa Qabdolova.

Turǵyndar túıden bólek jylqy malynan da belgisiz aýrý shyqqanyn aıtyp, alańdaýshylyq bildirip otyr. 

Mamandar aýyrýdyń sebebin anyqtaý maqsatynda synama alyp, zerthanaǵa jibergen. Biraq, Ulttyq referenttik veterınarııalyq ortalyq qozdyrǵashtardyń joǵyn anyqtaǵan.

— Oblys ákimdigi tarapynan Aýyl sharýashylyǵy mınıstrligi Veterınarlyq baqylaý jáne qadaǵalaý komıtetine usynys hat joldap, osy indettiń naqty neden paıda bolǵanyn anyqtaý maqsatynda arnaıy mamandardy jiberýin suradyq. Sol boıynsha qazir habar kútip otyrmyz, — dedi Oblystyq aýyl sharýashylyǵy jáne jer qatynastary basqarmasy veterınarııa bóliminiń bas mamany Yqylas Azamatov. 

Qurmanǵazy aýdanynda kúıisinen jańylyp, belgisiz aýrýǵa shaldyqqan 47 túıeni mal dárigerleri emdep jatyr. Al ólekselerdi jergilikti ákimdik pen veterınarııalyq qyzmet mamandary talapqa saı joıýǵa kiristi.

Eske sala keteıik, buǵan deıin Mańǵystaýda túıelerdi qaraqurt shaǵyp, úı janýarlaryna veterınarlyq kómek kórsetilip jatqanyn jazǵan edik.