Atyraý oblysynda Bas ımam taǵaıyndaldy
ATYRAÝ. KAZINFORM – QMDB Tóraǵasy, Bas múftı Naýryzbaı qajy Taǵanulynyń buıryǵymen Atyraý oblysynyń bas ımamy bolyp Bolatbek Ulasqanuly Ábý taǵaıyndaldy.
Oblys ákimi baspasóz qyzmetiniń málimetinshe, ol buǵan deıin Almaty qalasy Bostandyq aýdandyq «Baıken» meshiniń bas ımamy qyzmetin atqardy.
Atyraý oblysy ákiminiń orynbasary Daryn Shamuratov osy ýaqytqa deıin bas ımam bolǵan Altynbek Utyshanulyna óńirdegi rýhanı-adamgershilik qundylyqtardy damytýǵa, dástúrli dinniń izgi qaǵıdalardy jurtshylyqqa dáripteýdegi eńbegine, óńirdegi konfessııaaralyq kelisim men qoǵamdyq tutastyqtyń nyǵaıýyna qosqan úlesi úshin alǵys bildirdi.
Bolatbek Ábý 1982 jyly Qyzylorda oblysynda dúnıege kelgen, halyqaralyq deńgeıde tájirıbesi bar bilikti maman.
Ol Nur-Múbarak Egıpet ıslam mádenıeti ýnıversıtetiniń aýdarma isi mamandyǵy boıynsha bakalavryn, arab fılologııasy magıstratýrasyn, shetel fılologııasy boıynsha dokrantýrasyn támámdaǵan. Sondaı-aq 2013 jyly aımaqtyq áleýmettik-ınnovatsııalyq ýnıversıtetin, respýblıkalyq ımamdar bilimin jetildirý ýnıversıtetin bitirgen.
2017 jyly Nur-Múbarak ýnıversıteti janyndaǵy qaıta daıarlaý ınstıtýtynyń ekstremızmniń aldyn alý kýrsynan ótken.
Eńbek joly:
1999-2002 jyldar aralyǵynda - Qyzylorda obl., Baıqońyr qalasy «Járimbet ıshan» meshitinde azanshy, ustaz, naıb ımam;
2005 - 2008 jyldar aralyǵynda - Nur-Múbarak Egıpet ıslam mádenıeti ýnıversıteti Stýdentter keńesiniń múshesi, tóraǵasy orynbasary;
2008 - 2010 jyldar aralyǵynda Nur-Múbarak Egıpet ıslam mádenıeti ýnıversıteti rektorynyń referent-aýdarmashysy;
2009 - 2012 jyldar aralyǵynda Nur-Múbarak Egıpet ıslam mádenıeti ýnıversıtetinde oqytýshy;
2010 - 2014 jyldar aralyǵynda Nur-Múbarak Egıpet ıslam mádenıeti ýnıversıteti rektorynyń ákimshilik jáne halyqaralyq isteri jónindegi kómekshisi;
2014 - 2018 jyldar aralyǵynda - Nur-Múbarak Egıpet ıslam mádenıeti ýnıversıtetiniń Apparat jetekshisi, bas hatshy;
2018 - 2023 jyldar aralyǵynda QMDB-nyń Qyzylorda oblysy boıynsha ókili, «Aqmeshit-Syrdarııa» meshitiniń bas ımamy;
2023 jyldan bastap Almaty qalasy Bostandyq aýdandyq «Baıken» meshiniń bas ımamy qyzmetinde boldy.
Aqtóbe oblysynyń bas ımamy taǵaıyndalǵanyn jazǵan bolatynbyz.