Atyraý oblysynda balalar demalatyn jazǵy lager 25 maýsymǵa deıin ashylady

ATYRAÝ. KAZINFORM – Atyraý oblysynda balalar demalatyn jazǵy lager 25 maýsymǵa deıin ashylady.

Atyraý oblystyq bilim basqarmasy basshysynyń orynbasary Oryntaı Bımanovanyń aıtýynsha, bıyl mektep janynan 146 lager ashý josparlanǵan.

«Mektep janyndaǵy lagerler 10 maýsymǵa deıin jumysyn bastaıdy. Onyń keıbirinde tamaq beriledi. Óńirdegi tótenshe jaǵdaıǵa baılanysty Mahambet aýdanyndaǵy «Araı» lagerdi 25 maýsymǵa deıin ashý josparlanyp otyr», - dep habarlady Oryntaı Bımanova.

Bul óńirdegi Inder aýdanynda «Jas órken» lageri bar. Alaıda, atalǵan lager oqýshylardy qabyldamaıdy. Óıtkeni bul lagerge «Aýyl – el besigi» baǵdarlamasy aıasynda kúrdeli jóndeý júrgizý kózdelgen.

Oblystyq Bilim basqarmasynyń baspasóz qyzmetinen málim etkendeı, jazǵy demalys jáne saýyqtyrýmen 1-10 synyptyń 122 768 oqýshysyn qamtý jospalanǵan. Bul – mektep jasyndaǵy oqýshylardyń 93 paıyzy.

Sondaı-aq, «Qazaqstan halqyna» qoǵamdyq qorynyń demeýshiligimen atyraýlyq 128 bala Túrkistan oblysynyń Túlkibas aýdanyndaǵy demalys ortalyǵyna attanǵan. Olar – 10-14 jas aralyǵyndaǵy oqýshylar.

Eske sala ketelik, budan buryn atyraýlyq 700 oqýshy Túrkistandaǵy lagerde bes kezeńmen tegin demalatynyn habarlaǵan bolatynbyz.