Atyraý oblysynda ajyrasýǵa bel býǵan 62 jup raıynan qaıtqan

ATYRAÝ. KAZINFORM — Atyraý oblysynda 62 jup ajyrasýǵa aryz bergen. Alaıda quqyqtyq-aqparattyq keńes berý ortalyǵynan kómek alǵannan soń qaıta tatýlasqan. 

Atyraý oblystyq ishki saıasat basqarmasynyń basshysy Gúlnur Súıeýovanyń málimetinshe, atalǵan ortalyq mamyr aıynda ashylǵan. Sodan beri 2 myńǵa jýyq adamǵa quqyqtyq kómek berilgen. Onyń ishinde 510 adam psıhologtardan otbasylyq máselege keńes alǵan. 

— Bizdiń maqsatymyz — turǵyndarǵa quqyqtyq keńes berý. Qazir ortalyqta 2 zańger, 2 psıholog pen medıator jumys isteıdi. Olar bıyl Atyraý qalasy men 7 aýdanǵa ashyq esik kúnin ótkizdi. «Zań jáne tártip» taqyrybynda 11 joǵary oqý oryndary men kolledj stýdentterimen kezdesýde quqyqtyq saýattylyqqa basa nazar aýdaryldy. Áleýmettik turmysy tómen otbasylardyń músheleri sotqa júginýge usynatyn qujattaryn ázirleý úshin kómek aldy. Ortalyqtyń zańgerleri aıyrylysýǵa aryz bergen 62 jupty qaıta tatýlastyrdy, — deıdi «Shańyraq-2008» qoǵamdyq birlestiginiń jetekshisi Janar Іlııasova.

Onyń aıtýynsha, iri saýda ortalyqtarynda ashyq esik kúni uıymdastyrylyp, 68 adam tegin keńes alýǵa júgingen. Atalǵan joba aldaǵy eki jyl boıy jalǵasyn tabady.

Eske sala keteıik, buǵan deıin Atyraýda alıment tólemeı júrgender qumar oıynǵa qyrýar qarjy aýdarǵanyn habarlaǵan bolatynbyz.