Atyraý oblysynda aýlasyna marıhýana ósirgen turǵyn ustaldy
Atyraý oblysynda úıiniń aýlasyna marıhýana ósirgen turǵyn ustaldy, dep habarlaıdy Kazinform.
Oblystyq polıtsııa departamentiniń baspasóz qyzmetinen málim etkendeı, Mahambet aýdanynda turatyn 54 jastaǵy turǵyn úıiniń aýlasyna tıym salynǵan ósimdikti ósirgen.
– Esirtki qylmysyna qarsy is-qımyl basqarmasynyń qyzmetkerleri «Qarasora-2023» is-sharasy kezinde Mahambet aýdanynyń 1969 jylǵy turǵyny tyıym salynǵan ósimdikterdi shaǵyn alqap túrinde egip-ósirgenin anyqtady. Kúdiktiniń turǵylyqty meken-jaıyn tekserý kezinde aýlasynan 31 dana erekshe ıisi bar ósimdik pen keptirilgen esirtkige uqsas zattar tárkilendi. Saraptama qorytyndysyna sáıkes tárkilenip alynǵan zattar marıhýana esirtkisi ekeni anyqtaldy, - dep habarlady departamenttiń baspasóz qyzmeti.
Qazir polıtsııa qyzmetkerleri atalǵan derekke qatysty QR Qylmystyq kodeksiniń 300-babynyń 1-bóligimen (Ósirýge tyıym salynǵan ósimdikterdi egý nemese ósirý nemese soranyń, kóknárdiń nemese quramynda esirtki zattar bar basqa da ósimdikterdiń suryptaryn egip-ósirý) sotqa deıingi tergep-tekserýdi júrgizip jatyr. Ózge aqparat Qylmystyq-protsestik kodeksiniń 201-babyna sákes jarııalaýǵa jatpaıdy.
«Qazaqstan Respýblıkasy Konstıtýtsııasynyń 77-baby 3-tarmaǵynyń 1-tarmaqshasy, Qylmystyq-protsestik kodeksiniń 19-baby 1-bóligine sáıkes adamnyń kináli ekendigi zańdy kúshine engen sot úkimimen tanylǵansha ol jasalǵan qylmysqa kináli emes dep esepteledi», -dep málim etti departamenttiń baspasóz qyzmeti.
Eske sala ketelik, buǵan deıin Atyraýǵa jumysqa turýǵa kelgen BQO turǵynynan 1,5 myń doza esirtki tárkilengenin habarlaǵan bolatynbyz.
