Atyraý oblysynda Aýǵan soǵysynyń 435 ardagerine 150 myń teńgeden bir rettik kómek berildi
ATYRAÝ. KAZINFORM — Atyraý oblysynan Aýǵan soǵysyna 782 adam qatysqan. Qazir 435 ardager qalǵan. Olarǵa 150 myń teńgeden bir rettik kómek berildi.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń málimetinshe, bul maqsatqa bıýdjetten 65 mln 250 myń teńge bólingen.
«Qazir Atyraý oblysynda Aýǵan soǵysyna qatysqan 435 ardager turady. Onyń ishinde 44 adamǵa ár túrli toptaǵy múgedektik sanaty berilgen. Olardyń ómir súrý deńgeıi, turǵyn úıi jáne áleýmettik, materıaldyq jaǵdaıy zerdelenip, qoldaý kórsetý úshin arnaıy is-sharalar jospary jasaqtaldy. Bıyl Keńes áskerleri shekteýli kontıngentiniń Aýǵanstan Demokratııalyq Respýblıkasynan shyǵarylǵanyna 35 jyl tolýyna oraı ár ardagerge 150 myń teńgeden bir rettik áleýmettik kómek berý uıǵaryldy», - dep málim etti Azamat Mámbetov.
Eske sala ketelik, budan buryn Aýǵan soǵysyna qatysqan atyraýlyq ardager elge aman oralsaq degen úmitin úzbegenin aıtqan edi.
