Atyraý oblysynda aýdandyq ákimdikterdiń bólim basshylary zańsyz áreketke barǵan
ATYRAÝ. KAZINFORM - Atyraý oblysynyń aýdandyq ákimdikterindegi bólim basshylarynyń zańsyz áreketi anyqtaldy. Endi olarǵa qyzmetke tolyq sáıkes emestigi týraly eskertý túrindegi jaza qoldanylýy múmkin.
Memlekettik qyzmet isteri agenttigi Atyraý oblystyq departamentiniń Ádep jónindegi keńesinde Maqat jáne Qurmanǵazy aýdandyq ákimdigindegi bólim basshylarynyń tártiptik isi qaraldy.
«Maqat aýdandyq bilim bóliminiń basshysy basqa kásipkerlerdiń memlekettik satyp alý konkýrsyna qatysý múmkindigin shektegen. Basshynyń bir ǵımaratty 60 mln teńgege satyp alý úshin oǵan japsarlas ornalasqan nysannyń tehnıkalyq erekshelikterin zańsyz sáıkestendirý arqyly konkýrs jarııalaǵany anyqtaldy. Osylaısha, bólim basshysy tarapynan memlekettik satyp alý zańnamasynyń talaptary óreskel buzylǵan. Al Qurmanǵazy aýdandyq turǵyn úı-kommýnaldyq sharýashylyǵy, jolaýshylar kóligi, avtomobıl joldary jáne turǵyn úı ınspektsııasy bóliminiń basshysy tolyq aıaqtalmaǵan nysandy zańsyz qabyldap alǵan. Sóıtip, merdiger mekemege zańda kózdelmegen artyqshylyq kórsetken», - dep habarlady departamenttiń baspasóz qyzmeti.
Ádep jónindegi keńes músheleriniń sheshimimen atalǵan basshylarǵa memlekettik qyzmetke kir keltiretin teris qylyqtarǵa jol bergeni úshin atqaratyn laýazymdyq qyzmetke tolyq sáıkes emestigi týraly eskertý túrindegi jaza qoldaný jóninde usynys engizildi.
Eske sala ketelik, buǵan deıin Atyraý qalasynyń eks-ákimi tergeý ızolıatorynan úıqamaqqa jiberilgenin habarlaǵan bolatynbyz.
