Atyraý oblysynda aýa raıynyń qolaısyzdyǵynan eki baǵyttaǵy jol jabyldy

ATYRAÝ. KAZINFORM – Atyraý oblysynda kún buzyldy. Osyǵan baılanysty 2 jolda kólik qozǵalysyna ýaqytsha shekteý qoıyldy.

Atyraý oblysynyń tótenshe jaǵdaılar departamenti aýa raıyna baılanysty turǵyndarǵa eskertý berdi.

– «Qazgıdromet» RMK-nyń derekterine sáıkes, 5 naýryzda Atyraý oblysynyń soltústiginde, shyǵysynda, ońtústiginde qar, jaıaý burqasyn, kúndiz jaýyn-shashyn (jańbyr, qar), jaıaý burqasyn, kóktaıǵaq bolady. Túnde jáne tańerteń oblystyń soltústiginde, batysynda tuman. Ońtústik-batystan jel soǵady. Kúndiz oblystyń batysynda, soltústiginde, ońtústiginde jeldiń ekpini sekýndyna 17-22 metrge jetedi, -dep habarlady óńirlik departamentten.

Al «QazAvtoJol» UK» AQ-nyń málimetinshe, 5 naýryzda saǵat 14:00-den bastap Atyraý oblysynda aýa raıynyń qolaısyzdyǵyna (boran, kórinýdiń shektelýi) baılanysty respýblıkalyq mańyzy bar «Aqtóbe-Qandyaǵash-Dossor-Saǵyz» avtojolynyń Dossor kentinen Saǵyz aýylyna deıingi aralyǵynda júk jáne qoǵamdyq kólikterdiń qozǵalysyna ýaqytsha shekteý qoıyldy.

Sondaı-aq saǵat 14:40-ta taǵy bir jol jabyldy. Atyraý oblystyq Jolaýshylar kóligi jáne avtomobıl joldary basqarmasynyń málimetine qaraǵanda, Inder aýdanynyń ortalyǵy – Inderbor kentinen Qyzylqoǵa aýdanyndaǵy Saǵyz aýylyna deıingi jolda kólik qozǵalysy toqtatylǵan. Bul baǵytta «Inder-Qarabaý-Mııaly-Saǵyz» joly bar.

Eske sala ketelik, budan buryn búgin elimizdiń basym bóliginde kún qubylmaly bolatyny habarlanǵan edi.