Atyraý oblysynda ata-analar balasynyń mektep ashanasynan tamaq ishken-ishpegenin bilip otyrady
ATYRAÝ. KAZINFORM – Atyraý oblysyndaǵy mektepterdiń ashanalary «Alagan Mektep» júıesimen jumys isteıdi. Bul úshin bilim ordalary «Áleýmettik ámııan» servısine qosylady.
Atyraý oblystyq Bilim basqarmasynyń bas mamany Qadyrjan Saparovtyń aıtýynsha, oqýshylar ashanaǵa kirer kezde alaqanyn arnaıy qurylǵyǵa skanerleıdi.
– Bul ata-analarǵa balasynyń tamaqtanǵany, ashanadaǵy kúndelikti as máziri jaıly aqparatty alýyna múmkindik beredi. «Alagan Mektep» júıesi 2025 jyldyń naýryz aıyna deıin oblystaǵy 127 mektepte tolyqtaı iske qosylady, - deıdi Qadyrjan Saparov.
Bas mamannyń pikirinshe, bilim ordalarynda vaýcherlik qarjylandyrý júıesin engizý qolǵa alynǵan. Mundaı servısti iske qosý eki maqsatty kózdeıdi. Birinshisi – sybaılas jemqorlyq táýekelin azaıtý. Ekinshisi – oqýshylarǵa kórsetiletin qyzmettiń sapasyn arttyrý. Al turmysy tómen otbasylardyń 5-11-synyptarda oqıtyn 6958 balasy ystyq tamaqpen qamtylǵan.
- Olar týraly málimet «Bıznes ámııan» servısine engizilip jatyr. Endi olardyń ashanadan tamaq ishkeni týraly aqparat osy servıs arqyly rastalady. ıAǵnı, oqýshy ashanaǵa kirer kezde «Bıznes ámııan» qosymshasyndaǵy QR kodyn skanerleıdi. Bul júıe balalardyń qaýipsizdigin qamtamasyz etedi. Al, ata-analar balasynyń tamaq ishkenin nemese ishpegeni jóninde málimet alady, - deıdi Qadyrjan Saparov.
Sondaı-aq, 1-4-synyptarda oqıty 57 812, al, 5-11-synyptarda bilim alatyn 9947 oqýshy tegin tamaqpen qamtylǵan. Áleýmettik osal top sanatynan shyqqan olar jyl sońyna deıin «Bıznes ámııan» servısine qosylady.
Eske sala ketelik, budan buryn Atyraýda qaıtarylǵan qarjyǵa salynatyn mektep qurylysy qashan bastalatynyn jazǵan bolatynbyz.