Atyraý oblysynda áskerden oralǵan egiz sarbaz ben egiz zeınetker ýchaskege birge keldi
ATYRAÝ. KAZINFORM – Búgin Atyraý oblysynyń Qyzylqoǵa aýdanynda áskerden oralǵan egiz sarbaz áke-sheshesimen birge daýys berýge keldi. Al, Inder aýdanynda turatyn egiz zeınetker de birge daýys berdi.
Qyzylqoǵa aýdandyq ákimdiginiń aqparatyna qaraǵanda, egiz bozbala – Tuńǵyshbaı men Mádihat Eginbaı ásker qataryna byltyr shaqyrylǵan. Al, búgin, 6 qazanda úıine aman-esen oralǵan.
Osy aýdandaǵy Oıyl aýyldyq okrýginde turatyn Myrzataı Qazıev pen Almagúl Momynova egiz ulynyń áskerden oralǵanyna qýanyp júr. Olar qýanyshyn jasyra almaı, №147 referendým ýchaskesine egiz ulymen birge keldi.
«Ásker – jigitterdi shyńdaıtyn mektep. Degenmen, byltyr uldarymyz áskerge attanǵanda, kóńilde azdaǵan qobaljý bolǵan edi. Biraq, burynǵydaı eki jyl emes, bir jyl tez óte shyǵady ǵoı. Onyń ústine uldarymyzben jıi habarlasyp turdyq. Endi mine, búgin egiz ulymyz Otandy qorǵaý boryshyn abyroımen atqaryp, aman-esen ortamyzǵa oraldy. Bul – biz úshin úlken qýanysh. Sol qýanyshymyzdy aýyldastarymyzdan jasyrmaı, referendýmda daýys berýge birge keldik. Eldiń bolashaǵy úshin tańdaýymyzdy uldarymyzben birge jasadyq. Alda da elimiz aman, jurtymyz tynysh bolsyn», - deıdi Myrzataı Qazıev.
Sondaı-aq, Inder aýdanynyń Esbol aýylynda egiz zeınetker de daýys berý ýchaskesine birge keldi.
Zeınet jasyndaǵy Andaqulovalardyń esimi bir-birine uqsas. Biri – Aısulý, ekinshisi – Kúnsulý. Ekeýi de Inder aýdanyndaǵy Esbol aýylyndaǵy №122 referendým ýchaskesinde tirkelgen. Bir kúnde ómirge kelgen egiz zeınetker bir-birinen ajyramaı, daýys berý úshin ýchaskege birge kelýdi uıǵarypty.
«Biz bir-birimizdi izdep turamyz. Óıtkeni, biz –egizbiz. Búgingi referendýmda tańdaý jasaý úshin birge keldik. Zeıntker bolsaq ta, eldiń keleshegi jarqyn bolǵanyn qalaımyz», - deıdi olar.
Eske sala ketelik, buǵan deıin Atyraýda tirkelmegen saılaýshylar qalaı daýys beretinin habarlaǵan edik.
