Atyraý oblysynda «Altyn alqaly» anany turǵyn úı kezeginen zańsyz shyǵaryp tastaǵan
ATYRAÝ. KAZINFORM – Atyraý oblysynda 7 balasy bar «Altyn alqaly» ana 2016 jyly turǵyn úı kezegine turǵan. Alaıda, Maqat aýdanynyń ákimdigi kúıeýiniń atyna tirkelgen úıdi syltaýratyp, kóp balaly anany baspana alý kezeginen shyǵaryp tastaǵan.
Kópbala ana ákimdiktiń bul uıǵarymymen kelispeı, Atyraý oblystyq mamandandyrylǵan aýdanaralyq ákimshilik sotyna shaǵym túsirgen.
«2016 jyly 7 balanyń anasy turǵyn úı komıssııasynyń sheshimimen «Múgedek balalary bar nemese olardy tárbıelep otyrǵan otbasylar» sanatyna alynyp, memlekettik turǵyn úı qorynan muqtaj azamattarǵa baspana alý kezegine qoıylǵan. Alaıda, 2 jyldan keıin turǵyn úı komıssııasy kópbalaly anany Atyraý oblysynyń Maqat aýdanynda kúıeýiniń atyna tirkelgen úıin alǵa tartyp, kezekten shyǵarǵan. Osyǵan baılanysty áıel Atyraý oblystyq mamandandyrylǵan aýdanaralyq sotyna shaǵym túsirdi. Shaǵymda Maqat aýdanynyń ákimine jáne turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimine ózine qatysty hattamalyq sheshimniń bir bóligin zańsyz dep taný, «múgedek balalary bar nemese olardy tárbıelep otyrǵan otbasylar» sanatyndaǵy áleýmettik qorǵalatyn osal toptarǵa jatatyn turǵyn úıge muqtaj retindegi burynǵy kezegin qalpyna keltirýdi mindetteý týraly talabyn qoıdy», - dep habarlady oblystyq sottyń baspasóz qyzmeti.
Jergilikti sot isti zertteı kele, birneshe jaıtty anyqtady. Birinshiden, talap qoıýshynyń kópbalaly ana ekeni rastalǵan. Ekinshiden, 7 balany ómirge ákelip, tárbıelegeni úshin «Altyn alqamen» marapattalǵan. Úshinshiden, onyń otbasy «múgedek balalary bar nemese olardy tárbıelep otyrǵan otbasylar» sanatyndaǵy halyqtyń áleýmettik osal toptaryna jatatyny anyqtalyp otyr.
«Sot talap qoıýshynyń otbasymen birge turatyn úıi Maqat aýylynan 22 shaqyrym jerde ornalasqandyqtan, múmkindigi shekteýli balany úıde oqytý úshin oblys ortalyǵynan páter jaldaýǵa májbúr bolǵanyn eskerdi. QR «Turǵyn úı qatynastary týraly» zańynyń 73-babynyń 1-tarmaǵynyń talaptaryna sáıkes «Altyn alqa» alqasynyń ıegeri memleket esebinen turǵyn úı alǵanǵa deıin esepten shyǵarýǵa jatpaıdy», - dep málim etti sottyń baspasóz qyzmeti.
Atyraý oblystyq mamandandyrylǵan aýdanaralyq ákimshilik sotyna osyǵan baılanysty kópbalaly ananyń talabyn ishinara qanaǵattandyrdy. Ákimdik bóliminiń talap qoıýshyǵa qatysty hattamalyq sheshiminiń bir bóligi zańsyz dep tanylyp, kúshi joıyldy. Sot bólimge talap qoıýshynyń burynǵy kezegin «múgedek balalary bar nemese olardy tárbıelep otyrǵan otbasylar» sanatyndaǵy halyqtyń áleýmettik osal toptary tizimine engizýdi qalpyna keltirýge mindettedi.
Al, Joǵarǵy Sotttyń ákimshilik ister jónindegi sot alqasy jergilikti sottyń qorytyndysymen tolyq kelisti. Sóıtip, jaýapkerlerdiń kassatsııalyq shaǵymyn qanaǵattandyrýsyz qaldyrdy.
Eske sala ketelik, buǵan deıin Atyraýda kóp balaly ana turǵyn úı kezeginen zańsyz shyǵarylǵanyn jazǵan bolatynbyz.
