Atyraý oblysynda alıment bereshegi 4,8 mlrd teńgeden asty

Oblysta 5 myńnan astam balanyń quqyǵy buzylǵan 

Atyraý oblystyq Ádilet departamentiniń málimetine sáıkes, alıment óndirýge qatysty 11 267 atqarýshylyq is bar. Onyń 6 057-si boıynsha qarajat boryshkerlerdiń jalaqysynan turaqty ustalady, taǵy 1 480 is boıynsha tólem erikti túrde júrgiziledi. Al qalǵan 3 730 is boıynsha bereshek 4 mlrd 848 mln teńgeden asqan.

Bereshegi bar isterdiń 2 419-y boıynsha qarajat ishinara óndirilip jatyr. Qalǵan 1 311 is boıynsha alıment múldem óndirilmegen. Bul atqarýshylyq qujattar 5 myńnan astam balanyń múddesine qatysty.

Boryshkerlerge qoldanylatyn sharalar nátıje bermeı otyr

2026 jyldyń alǵashqy toǵyz aıynda alıment bereshegi bar 177 adam ákimshilik jaýapkershilikke tartylǵan. Olardyń 69-yna aıyppul salynyp, 87-si ákimshilik qamaqqa alynǵan, taǵy 21 adam qoǵamdyq jumysqa tartylǵan.

Sonymen birge alty aıdan astam ýaqyt alıment tóleýden qasaqana jaltarǵan boryshkerlerdi qylmystyq jaýapkershilikke tartý máselesi de kóterildi. Qujatta polıtsııaǵa osyndaı 36 usynys joldanyp, 21 jaǵdaı boıynsha sotqa deıingi tergep-tekserýdiń biryńǵaı tiziliminde tirkeý júrgizilgeni kórsetilgen. Tórt boryshkerge qatysty qylmystyq is sotta qaralyp, bir adamǵa bas bostandyǵyn shekteý jazasy taǵaıyndalǵan.

- Bos jumys oryndary jármeńkeleri ótkiziledi. Esepti kezeńde bes jármeńke uıymdastyrylyp, nátıjesinde 81 boryshker jumysqa ornalastyryldy. Bizdiń basty maqsatymyz – balalardyń laıyqty ómir súrýine jáne materıaldyq jaǵdaıynyń jaqsy bolýyna múmkindik jasaý. Aldaǵy ýaqytta quqyq qorǵaý organdarymen ózara yntymaqtastyqty kúsheıtý, bereshekti óndirip alý jumystaryn jandandyrý, sondaı-aq jeke sot oryndaýshylarynyń qyzmetine baqylaýdy kúsheıtý josparlanyp otyr, - dedi Atyraý oblystyq ádilet departamenti basshysynyń orynbasary Merýert Mýzatova.

Іzdeý jarııalanǵan 169 boryshkerdiń 132-si boıynsha aqparat joq

Taǵy bir másele – alıment tóleýden jaltarǵan azamattardy izdestirý. Oblysta 169 boryshkerge izdeý jarııalanǵanymen, ýákiletti organnyń málimeti boıynsha, tek 37 is boıynsha izdestirý jumystary júrgizilip, keıin qysqartylǵan. Qalǵan 132 is boıynsha aqparat bolmaǵan. Bul jaǵdaı boryshkerlerdi izdeý men memlekettik organdar arasyndaǵy ózara úılestirýdiń tıimdiligine qatysty suraq týǵyzady.

Jeke sot oryndaýshylarynyń jumysynda da olqylyqtar anyqtalǵan. Máselen, bir boryshkerdiń alıment boıynsha qaryzy 16,4 mln teńgeden assa da, onyń banktik shottaryna qatysty shekteýler alynǵany kórsetilgen.

Mamandardyń aıtýynsha, alıment óndirýge qatysty myńdaǵan atqarýshylyq qujattyń bir jeke sot oryndaýshysynyń qaraýyna shoǵyrlanýy istiń ýaqytyly ári sapaly oryndalýyna áser etedi. Osyǵan baılanysty qujattardy oryndaýshylar arasynda bólý tártibin qadaǵalaý jáne olardyń áreketsizdigi úshin jaýapkershilikti kúsheıtý usynyldy.

- Sot oryndaýshylardyń júktemesi joǵary ekenin eskerý kerek. Alaıda júktemeniń kóptigi – atqarýshylyq qujattardyń sapaly ári ýaqytyly oryndaýynan bosatpaıdy. Máselen, jeke sot oryndaýshy Sharıpovtyń oryndaýynda jalpy somasy 1 mlrd 597 mln teńge quratyn 886 atqarýshylyq qujat bar. Mundaı júkteme jumys sapasyna áser etýi múmkin, – dedi Atyraý qalalyq prokýratýrasynyń bólim prokýrory Kamıla Kenjetaı.

Jeke sot oryndaýshysy Meırambek Ájmuhanbetov istiń sozylýyna boryshkerlerdiń tabysyn jasyrýy negizgi sebep ekenin aıtty.

- Qazir boryshkerlerdiń beıresmı jumystaryn anyqtaý qıyndyq týdyryp tur. Máselen, qumar oıyn oınaıtyndar bar. Olar aqsha salǵan ýaqytta, ony qaıdan tapty, jalaqysy bar ma, jumysy bar ma - sony anyqtaý máselege ekeni ras. Ár boryshkerdi jaýapqa tartý úshin tabys kózin anyqtaý kerek bolady, – dedi jeke sot oryndaýshysy.

Mamandar máseleni sheshý úshin boryshkerlerdiń kirisi men múlkin anyqtaý júıesin jetildirý, memlekettik organdar men bankterdiń aqparattyq júıelerin ózara baılanystyrý, izdestirý jumysyna baqylaýdy kúsheıtý usynyldy.

Buǵan deıin Rıdderde alıment tólemeı júrgen boryshkerlerden 15,6 mln teńge óndirilgenin jazǵan edik.