Atyraý oblysynda aldaǵy úsh jylda 46 mektep, 27 balabaqsha nysany salynady

ATYRAÝ. KAZINFORM – Atyraý oblysynda aldaǵy úsh jylda 46 mektep, 27 balabaqsha nysanyn salý josparlanyp otyr. 

Atyraý oblysy ákiminiń orynbasary Jasulan Bısembıevtiń aıtýyna qaraǵanda, 2024-2027 jyldary birneshe nysannyń qurylysyn júrgizý qolǵa alynady.

«Ákimdik aldaǵy 3 jylǵa bilim berý salasyndaǵy júrgiziletin qurylys nysandarynyń tizimin jasaqtady. Bul tizimde 46 mektep pen japsarjaı, 27 balabaqsha, 2 kolledj, 3 lager, 4 ashana, 1 jataqhana, 3 qosymsha bilim ortalyǵy bar. Buǵan kúrdeli jóndeý júrgiziletin nysandar kirgizilgen joq. Jobalardyń aǵymdaǵy statýsy ártúrli, bunyń ishinde qurylysy aıaqtala kelgen, endi bastalǵan, konkýrstyq rásimder júrgizilip jatqan, jobalanyp jatqan da nysandar bar. Jospar bolǵan soń, ýaqyt ótisimen oǵan naqtylaýlar men jańartýlar jasalatyn bolady», - deıdi Jasulan Bısembıev. 

Onyń pikirinshe, ákimdiktiń qurylymdary osy jobalardy júzege asyrý kezinde usynys-pikirlerdi eskeredi.

Eske sala ketelik, buǵan deıin Atyraý mektepterinde qyzmet babynda qaıtys bolǵan polıtseı atyndaǵy kadet synyby ashylǵanyn habarlaǵan bolatynbyz.