Atyraý oblysynda 80 páterlik úıdiń qurylysy 5 jyldan beri aıaqtalmaı tur
ATYRAÝ. KAZINFORM – Inder aýdanynyń ortalyǵy Inderbor kentinde 2021 jyly bastalǵan 80 páterlik turǵyn úıdiń qurylysy belgilengen merzimnen birneshe jylǵa keshigip jatyr.
Úı 2021 jyldyń sońynda paıdalanýǵa berilýi tıis bolǵanymen, merdigerdiń mindettemelerin oryndamaýyna baılanysty kelisimshart buzylǵan. Qazir nysannyń daıyndyǵy - 68 %. Al ony aıaqtaý úshin jobaǵa túzetýler engizilip, qosymsha qarjy máselesi týyndady.
Kóktem shaǵynaýdanyndaǵy 80 páterlik turǵyn úıdiń qurylysy 2021 jyly bastalǵan. Joba boıynsha turǵyndar jyl sońynda qonys toıyn toılaýǵa tıis bolǵan. Alaıda merdiger mekeme kelisimsharttyq mindettemelerin ýaqytynda oryndamaǵan.
Osyǵan baılanysty 2023 jylǵy 13 qyrkúıekte merdigerdi memlekettik satyp alýdyń josyqsyz qatysýshysy dep taný týraly sotqa talap aryz berilgen. Atyraý oblysynyń mamandandyrylǵan aýdanaralyq ekonomıkalyq soty 2023 jyldyń 15 qarashasynda talapty qanaǵattandyrǵan. Al «Ondasyn-Stroı» JShS-men kelisimshart 2024 jylǵy 15 sáýirde buzylǵan. Keıin merdiger mekeme memlekettik satyp alý portalyndaǵy josyqsyz qatysýshylardyń tizimine engizildi.
Qazir nysannyń qurylys jumystarynyń 68 paıyzy oryndalǵan. Іrgetasy tolyq quıylyp, tas qalaý jumystary júrgizilgen. Qabyrǵalaryna sylaq jumystary ishinara jasalyp, shatyrdyń karkasy qurastyrylǵan. Elektr, sý jáne káriz jelileriniń bir bóligi júrgizilgen.
Aýdan ákimdiginiń resmı aqparatyna súıensek, nysanǵa tehnıkalyq zerdeleý júrgizilip, onyń qorytyndysy boıynsha qurylysty jalǵastyrýǵa ruqsat berilgen. ıAǵnı ǵımarattyń irgetasy men qabyrǵalarynda qurylysqa kedergi keltiretin zaqym anyqtalmaǵan.
- Qazir qalǵan jumystarǵa túzetýler engizilip, joba oblystyq bıýdjettik komıssııanyń qaraýynda tur. Komıssııa qorytyndysy alynǵannan keıin qujattar memlekettik saraptamaǵa jiberiledi. Oń qorytyndy bolsa, qajetti qarjy suratylyp, qurylys qaıta jalǵastyrý josparlanyp otyr,-dep pikir bildirdi Inder aýdandyq ákimdigi.
Bir qyzyǵy, qarjy jyl basynda suratylǵan. Ázirge naqty sheshim qabyldanbaǵan.
Jalpy jobanyń jalpy smetalyq quny 1 mlrd 260 mln teńgeden asady.
Alǵashyndaǵy jospar boıynsha bul úıge baspanalary apatty dep tanylǵan jáne memlekettik baǵdarlamalar boıynsha jeńildetilgen nesıege qol jetkizgen otbasylar qonystanýy tıis edi.
Aýdanda iske asyp jatqan taǵy bir joba - H.Nurmanov kóshesinde salynyp jatqan 60 páterlik turǵyn úı. Bul nysannyń qurylysy ótken jyldyń sońynda bastalǵan. Qazir baspananyń irgetasy quıylyp jatyr. Joba boıynsha úıdi ınjenerlik jelilerge qosý kózdelgen. Qurylys kásipkerdiń óz qarajaty esebinen júrgizilmek. Úı qurylysyn tolyq aıaqtaý 2027 jyldyń naýryzyna josparlanǵan.
Aıta keteıik, Inder aýdanynda baspana kezeginde 1 446 adam tur.
Buǵan deıin óńirge qarasty Isataı aýdanynda 2019 jyly qurylysy bastalǵan, keıin irgetasynan aqaý anyqtalǵan úsh kópqabatty turǵyn úı buzylatynyn jazǵan edik. Birneshe jyl boıy nysandardy saqtap qalý múmkindigi qarastyrylǵanymen, sońǵy tehnıkalyq qorytyndy nysandardy apatty dep tanyǵan.
