Atyraý oblysynda 7205 iri qara aýrý juqtyrdy
ATYRAÝ. KAZINFORM – Atyraý oblysynda 7205 iri qara aýrý juqtyryp, onyń altaýy shyǵyn boldy. Jeltoqsanda bastalǵan vırýstyq dıareıa men ınfektsııalyq rınotraheıt aýrýy áli kúnge toqtar emes.
Oblystyq aýyl sharýashylyǵy jáne jer qatynastary basqarmasynyń málimetinshe, epızootııalyq jaǵdaı ótken jyldyń sońynda kúrdelene bastaǵan. 2025 jylǵy 22 jeltoqsanda Qurmanǵazy aýdanynyń Bókeıhan, Dyńǵyzyl, Eńbekshi jáne Qurmanǵazy aýyldyq okrýgterinde iri qara mal arasynda aýrý belgileri anyqtalǵan.
Atap aıtqanda, sıyrlardan silekeı aǵyp, aýyz qýysynda afta paıda bolǵan jáne dene qyzýy kóterilgen. Zerthanalyq tekserýler nátıjesinde vırýstyq dıareıa men ınfektsııalyq rınotraheıt qozdyrǵyshtary anyqtalǵan edi.
Jalpy Qurmanǵazy aýdanynda 609 jeke úı men 55 sharýa qojalyǵynyń 6316 sıyry bul aýrýǵa shaldyqqan. Qazirgi ýaqytta 5484-i aýrýdan aıyqqan, al 826 sıyr emdelip jatyr. 6 iri qara shyǵyn bolǵan.
- Atyraý oblysynyń Qurmanǵazy aýdanynda iri qara mal arasynda tirkelgen aýrý jaǵdaıyna baılanysty epızootııalyq ahýal turaqty baqylaýǵa alyndy. Epızootııalyq jaǵdaı tolyq baqylaýda. Veterınarııalyq-sanıtarııalyq sharalar kesheni ýaqtyly júrgizilip, tıisti jumystar júrgizilip jatyr,-dep málimdedi basqarmanyń baspasóz qyzmeti.
Sonymen qatar, bul kesel Isataı aýdanynda da tirkelgen. Munda búginge deıin 889 bas iri qara maldan aýrý anyqtalǵan. Onyń 728-i emdelip shyqsa, 161 basy áli em qabyldap jatyr. Bul aýdanda mal shyǵyny tirkelmegen.
Jaýapty mekeme ókilderi óńirdegi epızootııalyq ahýal turaqty baqylaýda ekenin málimdedi. Qazirgi ýaqytta indettiń taralýyna jol bermeý úshin tıisti sharalar jalǵasyp jatyr.
Qysta Isataı aýdanynda mal azyǵy boıynsha másele týyndap, aýdan ákimdigi birneshe aýylǵa BQO-dan arzan baǵada jem jetkizip bergen edi.